حوت الأسكندرية ذو الزعنفة - سلسلة تعرف

حوت الأسكندرية ذو الزعنفة - سلسلة تعرف

أعزائي المستمعين في كل مكان السلام عليكم ورحمة الله و بركاته الحمد لله حالفني الحظ اني كنت في الأسكندرية الاسبوع اللي فات و قدرت أكون موجود في مسرح الحدث قبل أي قناة تانية و قبل نفوق حوت الأسكندرية  رحمه الله عليه و قدرت اعمل معاه انترفيو و أعرف ملابسات الحادث و أقف علي أسباب الوفاة و لمحات من حياة الحوت و ملابسات الواقعة و لكن مأفرجتش عن الحلقة ألا بعد ما الهوجة خلصت حرصا علي حقوق البث

- أستاذ حوت أنت صاحي؟!
-- (كح...كح) أنا فين ؟!!
- الحمد لله حمد الله علي سلامتك أنت وصلت أهدي مكان في العالم
-- المالديف؟!
- لا مالديف ايه انت في مصر
-- نهااار أسود يا عم سيبني في حالي ده انتوا بتاكلوا القناديل و بتتصوروا مع القروش سيبني في حالي و النبي يا عم.
- متخافش و الله انا مصري طيب
-- بجد
- اه و الله و جي أنقذك
-- انا ارتحتلك شكلك طيب فعلا و حتغير وجهة نظري في المصريين بس للأسف متأخر أنا بحتضر (كح... كح)
- لا حول ولا قوة ألا بالله طب انا أساعدك ازاي طيب
-- أنا ححكيلك حكايتي و تسلمها لأي جريدة أو موقع علمي زي T.Rex Magazine مثلا
- أنا مش عارف أقولك ايه واضح ان القدر هو اللي مدبر لقاءنا معاك T.Rex شخصيا
-- بجد و الله يا استاذ انا بحب مقالاتك قوي و بستناها
- ايه ده انتوا عندكوا نت زينا
-- امال دحنا واخدين من الكبل الأم
- الله يحرقكوا هوا انتوا اللي سارقيين النت و انا الل كنت ظالم TEdata و بقول عليهم حرامية
-- بس ده ميمنعش أنهم حرامية فعلا المهم أسمع الكلمتين عشان أنا بفرفر خلاص فمتقاطعنيش
مبدأيا انا حوت أنثي يا اعمي القلب و النظر من فصيلة حوت الزعنفة الظهرية ثاني أكبر حوت في العالم بعد الحوت الازرق
- أسف يا مودمزيل
-- تقبلتوا, من اسمي واضح ان عندي زعنفة علي ظهري في تلتين جسمي تقريبا موطني الأصلي المحيطات زي كل انواع الحيتان و بقضي موسم التزاوج في المحيطات الأستوائية عشان الهوني مون و خلافة و أهاجر بعدها في اتجاه القطب الشمالي عشان وفرة الأكل هناك و ده لأني بحتاج كمية غذا في اليوم بتعدي ال2 طن بسبب حجمي الكبير اللي بيوصل ل30 متر طول انا طولي 12 متر بس عشان لسه اوزي عندي 7 سنين

- يا كوكو و بالنسبة لوزنك
-- في راجل جنتل يسأل واحدة عن وزنها يا حيوان
- سوري
-- انا وزني 4 طن و كنت بخسس كمان من ساعة ما دخلت البحر الضيق بتاعكوا ده ان ما كلت لقمة عدلة كتكوا البلا انا لو كنت كملت مع عيلتي كان ممكن يوصل وزني ل 15 طن و أبقي حاجة كيرفي كده
- فعلا شكلك خاسس خالص
-- ميرسي ليك انت زوق خالص بس بقي و ايه كمان اه شكل راسي بيبقي مثلث زي ما انت شايف كده و لوني بيبقي رمادي مدي علي بلوبلاك سنة كده و عادتا بيبقا فيه خط ايلاينر ابيض كده بس الميكب باظ في الميه غير شوية خطوط كده اسفل الرأس بتسمي باللهيب مع شوية خرابيش بنقدر نميز بيهم افراد المجموعة بتاعتنا
- أمال انت سبتي مجموعتك ليه؟
-- أنا توهت واحنا رايحين رحلة القطب الشمالي السنوية التيارات البحرية استلقتني و قعدت تمخمض فيا و تمرش فيا لحد ما دخلتني البحر بتاعكوا ده و النوة رمتني هنا بعد ما قلة الاكل و المية عدموني العافية
- هو حضرتك يا هنا بقالك قد ايه انت واضح انك من فترة هنا لأن فيه ناس شافتك في مارينا من سنتين في 2016
-- لا مش انا ده المدهول حاتم جوز اختي هي أختي بتقول انه تاه بس أحنا متاكدين انها هي اللي خلصت منه عشان كان بخيل
- طب هو أنت مفترسة؟
-- انا باكل سمك معنديش سنان حتي لا انا ولا فصيلتي احنا تبع الحيتان البالينية بيبقي عندنا بدل السنان الواح كده في بوقنا بنصفي بيها السمك من المية
- أنت مرتبطة؟!
-- مش عارفة أقولك ايه بس انا متجوزة و مخلفة انا بخلف تقريبا كل سنتين ل 3 سنين و براعي البيبي بتاعي لمدة 6 شهور لحد ما يقدر يبقي قوي بما فيه الكفاية انه يبطل رضاعه و بعتمد علي نفسه

- و متوسط عمرك قد ايه في العادي؟
-- انا بعيش لحد 80 سنة في المعتاد لو محصليش حاجة بس عادتا بسبب التيارات و قلة الأكل في افراد كتير بتموت مننا زي كده
- أنا مش عارف أقولك ايه انت صعبانة عليا خاصتا انك في عز شبابك و معرضة للأنقراض برضوا و شكلك لوحدك في البحر بقالك فترة و انا اكتر واحد ممكن يحس بالموضوع ده
-- ممكن تريحني من مأساتي قبل ما حد يعرف اني هنا مش عايزة أطلع مع أحمد موسي و النبي
- يعني أعمل ايه؟!
-- Do what the T.Rex should do!
- لا انا كده حضرب السياحة أكتر ما هي مضروبة بالجزمة .
-- انا مقدرة خوفك علي بلدك ادعي ربنا ياخدني قبل ما يعرفوا عنك.
- ربنا ياخدك  بحق جاه النبي.
-- ....
- مدام حوتة انت معايا
لا حول ولا قوة الا بالله الدعوة رشقت فيها مش كنت اولا انا ادعي لنفسي بحاجة يلا الحمد لله ربنا رحمها
.
.
تم العثور علي الحوتة لاحقا علي شواطئ منطقة رشدي بالأسكندرية يوم 6 يناير
تم أبلاغ القوات البحرية لصعوبة نقل جثمان الفقيدة بسبب الوزن مما دعي الي سحب الجثمان بزوديك حتي الميناء لأستخراجها
و دفنها في مدافن الأحياء البحرية في الجير الحي لعرض هيكلها العظمي فيما بعد بمتحف الاحياء البحرية
لم يتم العثور علي اي كدمات علي جسد الحوتة الا بعض الخدوش اللتي نسبت بشكل غير منطقي لأحد وحوش العصر الجوراسي ولكن نفي المسئولين ذلك اذ ان الوفاة كانت طبيعية بسبب المياه الضحلة وقلة الغذاء ولا وجود لأي كائنات مفترسة منقرضة تؤثر علي حركة السياحة.

كان معكم #AK_TRex مراسل #TRex_Magazine من أمام جيلاتي عزة البتاع ده طعمه زي الزفت بس هي ارزاق سبحان الله.

Written by: Amr Khaled - T.Rex
#AK_TRex