منصوراصورس - أنترفيو مع الديناصور منصور

منصوراصورس - أنترفيو مع الديناصور منصور 

المكان أحد صحاري مصر علي ايدك الشمال لو انت باصص لفوق.....
- أنت متأكد ياأسطي أننا في الطريق كده صح
- يا عم أنت سامعني أنت متأكد اننا رايحين كده عالواحات الداخلة
-- ياعم و الله أيوه زهقتني كل شوية تسأل و و أقولك أيوه
- يا عم ماروحتش الواحات الداخلة قبل كده معرفش انها داخله جوه قوي كده
-- ايه القلش الرخيص ده شكلك حتتعبني الحمد لله أدينا وصلنا أنزل زهقتني
- يلا يا جماعة معلش الميزانية علي قدها المرة الجاية حأجرلكوا اتوبيس غرب الدلتا لوحدكوا سواق لوكل صحيح
دوروا معايا بقي كده عالديناصور الجديد ده
- هوب ... ايه اللي وقعني و كحولني كده هم العيال راحوا فين يا جدعان انتوا رحتوا فين يا جبنات مخصوم منكوا 62 يوم
-- وشششش
- أعوذ بالله من الشيطان الرجيم الصوت ده جي منين
-- وشششش تي ري يا تي ريكس
- مين اللي عارفني في الصحرا و بيندهلي و من غير بشمهندس كمان مين؟!
-- وشششش بص تحتك
- منصور منصووووووووور

-- وششششششششش الله يخربيتك حيسمعوك و يرجعوا تاني
- مين دول؟
-- كان فيه ناس هنا من شوية
- اه متقلقش ده فريق العمل بتاعي
-- أنت كمان اه يا نمس!
-لا ده فريق العمل بجد انا تيريكس و عمرو نوعا ما مش عمرو دياب
-- بجد تبعك يعني أمان؟
- هما مش أمان قوي يعني دول يبيعوا أبوهم بس متقلقش
-- أنا أفتكرتهم الناس التانيين
- مين دول يا ابني اللي انت خايف منهم قوي كده
-- ناس كده معاهم سافوريات و فرش بيزغزوني بيها في رجلي و في أماكن مش كويسة
- ايه ده حصلت كده انت لسه بتركب الهوا متنشف يا ابني كده
-- أكتر من كده أنشف أروح فين منا بقيت حفرية أهو
- أه معاك حق بس ايه يا ابني الغيبة الطويلة ديه 60 مليون سنة ياه كانت ايام حلوة و الله

-- يا عم دول بتوع 100 مليون سنة من أيام العصر الطباشيري هو انتوا في أنهي عصر دلوقت
- متتكلمش في السياسة أحسنلك
-- معلش أسف!
- المهم خدلك ساندوتش كبده بر بيه نفسك كنت مخبيه من العيال في العربية
-- كبده ايه يا عم انت نسيت انا فيجيتريان
- أنت لسه فيك العادة المهببة ديه يا عرة الديناصورات ديناصور فيجيتريان انت شاذ يلا؟!
-- ايه يا عم لزومها القباحة ديه انا ناقصك؟
- معلش حقك عليا الطريق كان زي الزفت بس بس يخربيتك انت خاسس كده ولا بيروح عليك الزمن ولا بيجي
-- يا عم مهو انا ديناصور عندي تقزم نتيجة قلة الاقل في اواخر العصر الطباشيري نسيت ولا ايه
- بس يا ابني مش كده دنتا كنت بتاع حوالي 5 طن و محصلتش 10 متر دنتا اللي الديناصورات اللي شبهك كانت بتوصل ل70 طن
انت تحسك نتيجة علاقة غير شرعية بين الزرافة و الفيل الأفريقي 😂
-- يا ابني بلاش طولة لسان التانيين العمالقة دول كانوا في زمن العز انا أجي ايه في البراتشيوصورس و فخامة و منجهة البراتشيوصورس

- بس انت أول مرة يلاقوا واحد زيك في أفريقيا و في مصر أنت اللي وقعت ولا الهوا اللي رماك
-- يا ابني مصر زمان كانت غير دلوقت فاكر الزرع و الخير طب فاكر نهر النيل
- متفكرنيش و قولتلك متتكلمش في السياسة
-- احم ما علينا المهم ان انا اول حفرية يكتشفوها بالحالة الكويسة ديه و خامس ديناصور في مصر و الاول من نوعي من افريقيا محدش لقي النوع بتاعي ده قبل كده
- أه دنا سمعت ان الفريق ده طلع روحه عشان يوصلولك
-- دول هنا من 2008 رايحين جايين نفضوا الصحرا أنهم يلاقوا ورك فرخة حتي ملاقوش لحد ما عكشوني
- دول مصريين؟
-- اه يا هم فريق بحثي يعتبر من أكبر فرق البحث عددا في مصر و كانوا بينقبوا هنا بقالهم كتير بقيادة دكتور هشام سلام أستاذ مساعد في جامعة المنصورة و لأول مرة يتم اكتشاف حفرية بالكامل من فريق مصري بدون باحث أجنبي

- حاجة عظيمة والله انا سمعت أنهم سفوا عليك يا تحفة و سموك منصوراصورس ههههههههههه
-- اه يا عم علي اسم جامعتهم بس هي فرقت منصور من منصوراصورس اهو دلع برضه و اسم عالمي هو انت اللي أسمك تيريكس
منتا اسمك تيرانوصورس يعني حد كلمك.
-خلاص يا ابني انت التحجر خلي خلقك ضيق
بس اللي فهمته ان أكتشافك بيوثق فترة مهمة جدا في العصر الطباشيري لأفريقيا و بيثبت فعلا ان اوروبا و افريقا و اسيا كانوا جزء واحد بدليل انك هاجرت من هناك لهنا او العكس يعني
-- فعلا المعلومات شحيحة جدا عن العصر ده في قارة اقريقيا بالذات و بيفتح الباب و الفرص ان فرق تانية تنقب عن حفريات أكتر و انهم يعرفوا أكتر عن العصر ده

- بس يا ابني هما لقوك ازاي؟
-- اهو المثابرة كانوا مصممين حالفين طلاق تلاتة ما يسيبوا الصحرا الا لما يطلعوا بديناصور
 دول بقالهم 3 أسابيع في الجو المنيل ده بيحفروا و يزغزغوا فيها و يعالجوني بالصمغ عشان يطلعوا حفريتي بأفضل صورة ممكنة و يحافظوا عليها
- يلا المهم اني أطمنت عليك متعرفش حيودوك انهي متحف ؟
-- متحف ايه انت حتسيبني هنا انت مش جي تاخودني معاكي؟!!
-اخدك معايا فين هي ناقصة بلاوي أنت تراث دلوقت ارقد مكانك بدل ما انده فريق الباحثين يعملوا عليك حفله زغزغة أرقد
-- حاضر حاضر حرقد خلاص أسف
كان معكم #AK_TRex  موفد #TRex_Magazine من أمام حفرية منصور ... أرقد يلا شايفك علي فكره...
ناقصة هي لما أشوف البلاوي التنيين راحوا فين مخصوم منهم 93 يوم عشان الاهمال ده بس الأول اشوف حد منهم معاه باقة نطلب أوبر يرجعنا و بعدين أبقي أخصملهم.

Written by: Amr Khaled - T.Rex
#AK_TRex
#TRex_Magazine