Koala - أنترفيو مع الكوالا - سلسلة تعرف

Koala - أنترفيو مع الكوالا - سلسلة تعرف

مستمعينا مساء الخير و هابي ويك أند عليكوا معايا و يا رب تكونوا بألف صحة و خير. معانا ضيف النهاردة لقينا صعوبات كتير عشان نعمل معاه لقاء الفكرة مش بس انه موجود في مكان بعيد عنا جدا الصعوبة كانت في أننا نلاقيه صاحي أصلا معايا و معاكم كمال دب الكوالا..


-أزيك يا بو كمال
-- الحمد لله تمام يا تيري منور أستراليا بس مبدأيا أنا مش دب
- أيه يا عم الدخله ديه ما أنت شبه الدباديب بس علي زبلة شوية بتتنكر من أصلك ليه
-- يا عم و الله أبدا بس انا فعلا مش دب لأنا تبعهم و لا ليا دعوة بيهم
- أزاي بقي دنتا حتي بتتباع مع الدباديب في المحلات
-- و الله العظيم ما دبدوب أنا بتبع فصيلة الثدييات الجرابية زي الكانجارو بالظبط
- طب انا راضي زمتك ده منظر كانجرو لأنتا عندك ديل ولا رجلين طوال ولا ماشي تتنطط طول اليوم أنا واصل شجرتك من 10 ساعات مشوفتكش أتقلبت حتي
-- يا عم تبع الجرابيات صدقني أقولك أصحيلك باكينام توريك الجراب
- يا عم عيب الكلام ده سيب المدام نايمة لنا عايز شاي ولا حاجة بس يعني أنت عندك جراب زي الكانجرو و المدام بتحط البيبي فيه و كده
-- اه البيبي عندنا بيتولد عالجراب علطول يقعد فيه حوالي 7 شهور لحد ما يكتمل نموه
- سبحان الله مش مقنع انك تتعامل معاملة كانجرو بس ماشي حنرجع لحوار البيبي ده تاني بس كلمنا عن نفسك الأول شوية يا كمال
-- بص يا سيدي أنا زي ما قولتلك حيوان من الثدييات الجرابية او الكيسية بعيش بشكل أساسي في غابات استراليا

- يا عم انت واصفلي العنوان عند الشجرة الي هناك ديه و أنت مخمود هنا أفرض كنت خبطت علي كوالا تاني
-- لا متقلقش مش معني اني نايم أني مش مسيطر ال100 شجرة اللي حواليك دول تبع العبد لله و يمكن يكونوا اكتر من 100 كمان
- بجد ربنا يوسع عليك يا ابو كمال و يزيدك أنا قولت بتتهرب مني عشان عايز تنام
-- عيب عليك أنا موضوع النوم ده مش بأيدي و الله هو أحنا كلنا كده بنام من 18 ل20 ساعة كل يوم
- يخربيتك بتصحي 6 ساعات بالكتير بس دول بتلحق تعمل فيهم حاجة يا ابني دنتا متلحقش تتشمس حتي
-- لا منا بصحي بليل الشمس ديه للنوم و الأنتخه أنا كائن ليلي و هما ال6 ساعات فرهدة و تنطيط علي الشجر دول كفاية أكل فيهم و باكينام تاكل و تأكل العيال و نرجع ننام تاني


- أنتوا بتاكلوا من شجر ايه بقي؟
-- في الغالب بيبقي أوراق شجر الكافور بس ممكن القط من أشجار الفاكهة برضه علي سبيل الديسيرت
-لا ثواني أرجع سنه ورا كده بالكلام هو انت مبتاكلش في حياتك غير ورق كافور؟؟؟1
 -- تقريبا بنسبة 98% عايش عالكافور حتي الميه مبشربهاش الا قليل العصارة و الزيوت اللي بتبقي في الورق بيكفوني و يخلوا رطوبة جسمي كويسة حتي بيقال أن رحتي كلها بتبقي كافور أصلا زي ريحة برونشيكم بتاع الكحة
- طب يا كمال أنا مش عارف أجبلك الموضوع ازاي بغض النظر عن الهمدان و الأنتخة اللي أنت فيهم دول أنت حياتك العاطفية بكمية الكافور ديه عاملة أزاي
-- لا يا عم أنا زي الفل لما بنيجي للنقطة ديه في موسم التزاوج بقلل كافور شوية و أقضيها فاكهة و أرجع لكورس الكافور تاني بعدها لأن المدام بتاخدلها في الجرو الواحد حمل سنة و تقعد شايلاه بعدها سنة و نص أضرب كافور براحتي بقي دنا باكل في اليوم بتاع 2 كيلو و أنا كل وزني أصلا 12 كيلو ده يعني يوم ما أبقي أقصي وزن

- 2 كيلو كافور يخربيتك ده كتره سام أصلا
-- لا منا معدتي بتكسر ورق الكافور و بتاخد العصارة المفيدة و بخرج المواد السامة مع الفضلات
- سبحان الله و أنت علي كده بتعيش مع أنثي واحدة بس بكافورك ده؟
-- لا مش شرط طالما عندي منطقتي و شجري ربك بيرزق بطلع صوت عامل لمؤاخذة زي الشخير كده بيخوف أعدائي و بنفس الوقت بيجذب أناث الكوالا
- بتعملوا كل ده في 6 ساعات دنتوا فاشخين الTime management و الله دنتوا تيجوا كورسات
-- لا يا عم مش طالبة فرهدة
- أه معلش نسيت أنك صاحب كافور طيب قلتلي ان المدام بتقعد تربي في العيال سنة و نص
-- أه 7 شهور في الكيس و 9 تقريبا علي ضهرها و تجيبله الأكل و تطحنهوله تخلطه بريقها و تخفف المواد السامة اللي فيه لحد ما يقدر يعتمد علي نفسه و معدته تبقي مؤهلة انه ياكل لوحده

- سو كيوت. كمال أنت معرض للأنقراض
-- ده حقيقي الصيادين كانوا في أوائل 1900 بيصطادوني بكميات كبيره عشان الفرو بتاعي لدرجة أن أعدادنا تقلصت بنسبة 40% عشان الصيد و تقلص الغابات في أستراليا فبنموت من الجوع كمان حاجة كده تصعب عالبوبي
- حاجة بشعة بس انتوا حاليا تحت حماية الحكومة الأسترالية و بتحظر صيدكم و بتعتبركم تبع تراث أستراليا البيئي و أيقونة تمثل هويتهم زي الكانجرو
-- ده حقيقي كتر خيرهم و الله أنت خلصت ولا لسه أنا عايز أكل عشان ألحق أنام يا عم
- سؤال أخير بس انت فعلا كيوت و حبوب و غير مؤذي؟
-- طول ما البني أدمين بعيد عني مبأذيش حد أنا نباتي بس تحاول تمسكني بقي تصطادني او تهزر معايا هزار سمج أنا مخالبي قوية جدا و عندي أنياب ممكن تتسبب بجروح كبيره

- لا شبح بس متمثلش أنا عارف أنك بتحب تتحضن
-- عيب عليا يا تيري دحنا الشقاوة فينا بس الكافور اللي مهدينا
- أصلي يلا سويت دريمز
-- خخخخخخخ..خخخ
- أنت نمت أصلا
و بكده تكون خلصت حلقة النهاردة أتمني نكون قدرنا نغطي كل المعلومات عن الكوالا و لازم أمشي بقي لأنه نام من غير ما يشد كافور و شكله حيتحول ربنا يكون في عونك يا باكينام... انجوي يو ويك أند.

Written by: Amr Khaled - T.Rex
#AK_TRex
#TRex_Magazine
  المصدر:
National Geographic

التعليقات
0 التعليقات