العاصفة الرملية غضب من الطبيعة و رحمة

العاصفة الرملية غضب من الطبيعة و رحمة

الكوارث الطبيعية متنفس كوكبنا للتعبير عن غضبه و في نفس الوقت واحدة من أدوات الكوكب لأستعادة توازنه و أعادة توزيع العناصر البيئية للحفاظ علي البنية التحتية للكوكب. ستوب حلو الكلام ده الكلام ده كبير قوي يصعب علي أمثالي فهمه كلمنا بالهجايص يا عم مش حتبقي أنت و التراب علينا و بعدين رحمة ايه بس انت اعمي القلب و النظر. أحنا متبهدلين يا أبني أتردمنا و متبهدلين كحة و عفار و محدش شايف حاجة و كله ماشي يضبش تفرق ايه في أذاها ديه عن الضباب ولا الزلازل أو الأعاصير اللي كلمتنا عنهم قبل كده.
أستهدي بالله بس كده و ميبقاش خلقك ضيق و حناخدها مع بعض واحدة واحدة كده زي ما احنا متعودين مع بعض عشان نطلع بالزتونة في الأخر. قبل ما نناقش المميزات و العيوب لازم نفهم الحاجة اللي أحنا بنتعامل معاها الأول و نبدأ نعرف

هي بتتكون أزاي و ايه أسبابها؟

العواصف الغبارية أو الرملية بتتكون نتيجة هبوب رياح قوية علي منطقة واسعة بتعاني من الجفاف و أرتفاع الحرارة الأمر اللي بيسبب فرق في الضغط بين الرياح علي مستوي سطح الارض و بين باقي تيار الرياح في المستويات الأعلي و بيبقي عندنا تيار رياح صاعد جوا تيار الرياح نفس فكرة الأعصار بس ده بدل ما بيشيل في قلبه ميه بيشيل حبات الغبار بمختلف أحجامها حسب سرعة الرياح اللي برضه بتحدد الغبار ده حيوصل لأرتفاع قد ايه أحنا بنتكلم من أول نص متر لحد مئات الكيلومترات. يبقي العناصر الأساسية في العاصفة ديه بتبقي الرياح الجفاف و مسطح محترم من الرمل و الغبار و ده متوفر عندنا في مصر يمين و شمال بسم الله ما شاء الله.

ايه هي أنواعها و درجة خطورتهم؟

زي ما قولنا سرعة الرياح هي العامل الأساسي و اللي بيحدد قدرة العاصفة الترابية و مدي الضرر اللي ممكن تسببه و كل ما علي جدار الغبار بتقدر تسمي العاصفة وقتها العاصفة الجدارية لأن اللي بتواجهه ساعتها بيكون بالفعل أشبه بجدار متحرك من حبات الرمل و الغبار من المعادن و البكتيريا و كل الجسيمات اللي ممكن اللي ممكن تتواجد في الصورة الغبارية حتي الجلد الميت بتاع الكائنات الحية. و بيختلف لون العاصفة الجدارية حسب لون الرمل أو المكان اللي هبت فيه ممكن الشائع الأصفر و الأحمر زي ماشوفنا ي صور قنا و أسوان بس أحيانا بتقلب أسود خالص و العياذ بالله لو السماء كانت مليانة سحب أصلا من الأول النهار بيقلب ليل حرفيا.

أشرارها كواحدة من الكوارث الطبيعية؟

أضرار جسيمات الغبار حاجة كلنا بندركها لأنها بتسبب الاختناق بالذات للناس اللي عندها مشاكل في التنفس أصلا و كمان كبار السن و الأطفال لأن بتبقي مناعتهم ضعيفة كمان المشكلة اللي بنواجهها علي الطرق للناس اللي بتسوق هي ضعف الرؤية أمبارح بليل حرفيا الواح مكانش شايف 100 متر قدامه و كان فيه شبه أنعدام للرؤية حتي جوه المدينة و الموضوع كان متنيل أكتر علي طرق السفر و ده بيسبب حوادث كتير ربنا يعفيكم و يعفينا. كمان التراب ده بيموت الزرع و بسيبب أضرار مادية أخري بيوقع عواميد النور و التندات و اليفط و بيسبب خسائر كتير غير العربيات اللي بتتبهدل و بيتكسر أزازها بسبب الطوب و حبات الرمل الكبيرة اللي بتبقي عاملة زي الصنفرة بتاكل في اللي يقابلها. كمان الرياح ديه بتبقي محملة بالجراثيم و البكتيريا و كل الأمراض التنفسية اللي ممكن تلاقيها في سكتك لأنها بتاخد طبقة سطحية من القشرة الارضية و هي اللي بيبقي راقد عليها كل البلاوي ديه.. 

رحمة ربنا و ازاي هي مفيدة للكوكب؟

رحمة أيه بقي أنت خليت فيها رحمة بعد كل اللي بتقوله ده أمراض و خسائر مادية و حوادث متضربونا بالنار أحسن. أولا ربنا أرحم منه مفيش زي ما العواصف الغبارية مضره بتبجي معاها رحمة ربنا و فوايد كتير مبدأيا كده دايما العواصف الترابية بتيجي في تسليم الورادي بين الشتاء و الصيف. الغبار زي ما هو مضر بصحة الانسان فهو برضه بحمل معاه حاجات مفيدة كمان زي حبوب اللقاح و اللي حتلقح بدورها النباتات القوية اللي نجت من العاصفة و حتطلعلنا ورد و ثمار ناكل و ده دور في حد ذاته عظيم لأنه ضروري جدا لأخصاب النبات. كمان زي ما قولنا كل البكتيريا و الجراثيم و الأمراض بعد أنتهاء العاصفة حتبقي مشتته مش حتبقي مركزة في مكان معين بنسبة كبيرة زي الأول لا أنت أكنك قلبت التربة في قلب بعضها بدل ما كان عندك قشرة ثابته عمال بيتراكم فيها بلاوي. العاصفة الترابية دايما بينزل بعدها المطر لأن الغبار نقدر نقول انه بيلقح السحب و بتتجمع حواليه قطرات الماء و تتحول لسحب ممطرة و تنزل رحمة ربنا تغسل كل حاجة و تمدنا بالمية اللي أحنا عارفين قيمتها كويس بعد أزمة مياه كيب تاون و كأن فعلا الكوكب بينضف نفسه علي مراحل بيقلب و بعدين يغسل منظومة  ألهية قمة في الروعة و الدقة. وأخيرا المعادن اللي بتتكنس من اليابسة و بتنزل البحار و المحيطات بتروفر الغذاء المعدني للطحالب و النباتات البحرية اللي ليها دور كبير انها تمد كوكبنا بالأكسجين و جمالها انها بعيدة عن أيدنا غير الغابات اللي بننحر فيها كل يوم و بكده في مصدر أكسجين ألهي بيجدد جونا بأستمرار.

ازاي نحمي نفسنا من خطر العواصف الترابية؟

مبدأيا كده لازم نبقي متطلعين علي الاخبار أول بأول في الوقت المتعارف عليه انه موسم العواصف من النوع ده عشان نقدر نستعد قبلها في بيوتنا. أولا لازم نقفل كل الشباببيك و ننزل الستاير لأنها بتصد نوعا كم من الغبار و يستحسن لو احنا في منطقة مفتوحة اننا نبقي عاملين حسابنا و نحاوط المكان بأشجار عالية تعمل تخميد لسرعة الرياح و تصفي الجو من الغبار. متنزلش من بيتك قدر الأمكان ألا لو كنت مضطر و تجنب الأماكن المزدحمة عشان العدوي و الميكروبات لو ضروري أبقي ألبس ماسك أو كمامة طبية مش عيب عادي علي فكرة. تجنب أنك تبقي لسه مستحمي و تنزل عشان جلدك ميلتهبش عشان مسام جلدك بتبقي لسه مفتوحة. ألبس لبس يغطي كل جسمك قدر الأمكان و متلبسش حاجات فيها أياف و بتحوش تراب زي الحاجات اللي فيها فرو أو قطيفة مثلا. أشراب ميه و سوائل دافية كتير و كتر من اكل الخضراوات و الفاكهة بالذات اللي بتحتوي علي فيتامين C . و أخيرا تاني متنزلش من بيتك ألا لو كنت مضطر و ألتزموا بدعاء النبي (صلي الله عليه و سلم)

 "اللهم إني أسألك خيرها وخير ما فيها وخير ما أرسلت به، وأعوذ بك من شرها وشر ما فيها وشر ما أرسلت به"
و خلوا بالكوا من نفسكوا و متنسوش تأنجوي يور ويك أند ..

Written by: Amr Khaled - T.Rex
#AK_TRex
#TRex_Magazine