نمر سيبيريا - نمر رامز تحت الصفر

نمر سيبيريا - نمر رامز تحت الصفر 

كل سنة و انتوا طيبين و سنة سعيدة عليكم يا رب و رمضان كريم زي ما أتكلمنا السنة اللي فاتت عن تنين الكومودو أو سحلية رامز  جلال زي ما الناس كانت مسمياها و استغلينا البرنامج و شغف الناس أنها تعرف معلومات عن السحلية ديه في أننا نقول معلومة مفيدة فأكيد مش حنعدي الفرصة السنادي و نتلكم عن حيوانات رامز برضه لأنه المرادي جايب حيوانين مش واحد و زي ما قولنا المرة اللي فاتت رب ضارة نافعة دور علي الأستفادة حتي و لو وسط الهري المبتذل بتاع رامز.

حنتكلم في أول موضوع عن النمر لأنه شكله عاجبني الصراحة أكتر من الدبة العيانة اللي عندها السل ديه. نمر سيبريا بيعتبر من أكبر النمور علي مستوي العالم ده لو وصل لحجمه الطبيبعي في البرية اللي في البرنامج مع رامز بيعتبر وصل لتلتين حجمه المعتاد تقريبا فلك أن تتخيل النمر ده في العادي حجمه بيبقي عامل أزاي.
النمر السيبيري زي ما قولنا هو أكبر أفراد عائلة القطط و بيتميز عن أقرانه سبحان الله بفروه المبطن بطبقه من الدهون بتخليه يقدر يتأقلم مع درجات حرارة بتوصل -45 و يمكن أكتر كمان بيعيش نمر سيبريا بشكل أساسي في أقصي شرق روسيا و الأبحاث بتأكد أنه في فتره من الفترات كانت بترطة صلة بالنمر البنغالي و هو نوع من النمور الضخمة و الشرسة برضه بس بتعيش في الهند و دول الشرق الأقصي بشكل أساسي. قدر النمر السيبيري أنه يتفوق في الحجم و السرعة و القدرة علي التكييف مع البرودة الامر اللي بيخليه أشد فتكا و رعبا بوزن ممكن يوصل ل300 كجم و طول 3متر 

الفرائس المفضلة لنمور سيبريا بتكون الغزلان و الارانب و الخنازير البرية و اللي متوفرة بكثرة في غابات الصنوبر اللي علي حدود روسيا و لسه الطبيعة محتفظة بجزء من كيانها و متسلحا بسرعته و قوته الهائلة و قدرته علي التموه وسط الاشجار و الندماج مع الطبيعة المحيطة ليه بفضل الخطوط علي جسمه اللي بتخليه شيه جزء من الطبيعة المحيطة بيه ألا أن ده برضه مخلهوش يسلم من الكائن المؤذي اللي أسمه البني ادم اللي بسبب رياضة الصيد و الطمع في فروة الباهظ الثمن بيعتبر نمر سيبريا من الكائنات المهددة بالأنقراض.

سلوك النمر في عملية التزاوج حماه الي حد ما من موضوع الانقراض بشكل دائم لأن النوع ده من النمور كائن بوهيمي بيتزاوج في أي وقت في السنة بمجرد البلوغ بيققعد أسبوع عسل مع الأنثي اللي بتبقي معلمة الشجر في منطقتها معبرة عن نيتها و استعدادها للزواج و بتستني أبن الحلال اللي بيقعد معاها اسبوع يعمل الصح و يفلق كعادة بني جنسه من القطط و يسيبها لوحدها عشان تخوض فتره حمل بتترواح من 3شهور الي 3 شهور و نص  بيجي بعدها من جرويين ل4 جراوي نمور  و بيفضلوا مع أمهم فترة حضانة بتوصل ل3 سنوات عشان يقوموا بدورهم في الحياة و يحافظوا علي سلالة بني جنسهم في الفترة ديه بيداوا باللعب مع أمهم و تنميه مهاراتهم و غريزتهم علي البقاء لمدة 18 شهر و بعد كده يبدأوا دورة مكثفة في الصيد عشان يقدروا يجيبوا أكلهم بنفسهم و يستعدوا لمرحلة الأنفصال عن الأم.

وصلت اعداد نمور سيبريا بشكل مؤسف سنة 1930 ل 30 نمر تقريبا أول عن أخر الأمر اللي كان جرس أنذار بينبه بفقدان كائن من جيراننا علي الكوكب الا أن تدخل الأنسان المرادي كان للخير و تم عمل محميات خاصة ليهم عشان ترتفع اعدادهم مجددا و توصل لحوالي 500 تقريبا و ده رقم قليل ألا أنه مقبول الي حد ما لكائن كان علي وشك الفناء.
عمتا لو فرضنا أنك شوفت النمر ده و أنت بتتنزه في غابات سيبريا أتشاهد هي ملهاش حل تاني لو معكش حاجه قوية تدافع بيها عن نفسك بازوكا مثلا أو لو فرضنا انك كنت كائن جوراسي منقرض ممكن ساعتها يبقي عندك فرصه للنجاة.

كان معكم #AK_TRex من غابات روسيا مع رامز اللي عامل نفسه مستر كوبر و بيستغفل الناس و هما عارفين و متعايشين مع الوضع و بيتفرجوا عليه عادي برضه :D أشوفكوا المرة الجاية مع الدبة.

Written by:Amr Khaled- T.Rex
#AK_TRex
#TRex_Magazine