Cern مفاعل التصادم الكبير LHC

Cern مفاعل التصادم الكبير LHC

مفاعل التصادم الكبير


لا ده مش من أسلحة جرندايزر Large Hadron collider أو LHC تقدر تعتبره أكبر منشأة أو جهاز تجارب بناه الأنسان و أستخدم فيها كل العلم الهندسي اللي ممكن تتخيله عشان يقدر يعمل تجارب تخليه يفهم بنية الكون اللي أحنا عايشين فيه.خلال أقل من 10 سنين تمكن المهندسين أنهم يحققوا أحلام و جنون علماء الفيزياء و بتكلفة بسيطة جدا بتفوق ال9 مليار دولار أيوه يعني يطلعوا كام دول ؟؟؟؟!
9 مليار دولار هي تكلفة أنشاء مصادم الهادرونات الكبير بس ليه يعني بيعمل أيه البتاع ده و مين اللي عنده المقدرة انه يدفع الفلوس ديه كلها و ليه أصلا كل ده عشان أجاوب علي اسئلة ما بعد منتصف الليل و انام بدري يعني؟
واحدة واحدة اللي ورا أنشاء الLHC هي وكالة CERN و تقدر تعرفها علي أنها
 Conseil Européen pour la Recherche Nucléaire المنظمة الأوروبية للأبحاث النووية يعني تقريبا هي المشرفة علي كل الأبحاث النووية في قارة أوروبا و كده عرفنا مين بيمول الأبحاث بس قبل ما نعرف ليه هم بيدفعوا كل الفلوس ديه نحاول نفهم الفلوس ديه اتصرفت علي ايه يعني هو البتاع ده عبارة عن ايه

مكونات مصادم الهادرونات الكبير

أستني بس متكروتناش أحنا حنخبط ايه في بعض ايه الهادرونات ديه و ليه الأذي نخبطهم في بعض ليه؟
الهادرونات ديه الجسيمات الدون ذرية يعني الكواركات بروتونات و نيوترونات أما ليه عايزين نخبطهم في بعض حنجاوب عليها بعدين.
المفاعل بتاعنا عبارة عن أنبوبة أيوه زي ما سمعت كده انبوبة او أتنين بمعني اصح و مدفونة علي عمق 100 م تحت الأرض بطول 27كم و هي من الكبر انها تكون بين دولتين فرنسا و سويسرا 



الأنبوبة ديه تحت الأرض علي العمق ده عشان متأثرش الأشعة الكونية علي نتائج الابحاث أما عن طول الأنبوبة 27كم فهو الطول الكافي اللي مع التبريد بالهيليوم لدرجة أقرب ما يكون للصفر كلفن طبعا مبيوصللوهاش بس بيقدروا انهم يوصلوا ل2 كلفن تقريبا
يعني كده احنا عندنا ماسورتين متبردين تبريد فائق و زود عليهم مجالات مغناطيسية قوية زي بتاعة أشعة الرنين المعناطيسي كده و اللي في منها 1600 مغناطيس فائق التوصيل وزن الواحد 27 طن.
 الأنبوبتين ليهم 4 نقط تلاقي بتخلينا ممكن نعمل أصطدام فيهم في النقط ديه فيه أجهزة القياس الأشبه بكاميرات الي حد ما و اللي بترصد نتائج الأصطدام و هي (ATLAS,  LCHb, CMS , ALICE)
ضيف عليهم اخيرا مسرع مساعد صغنون علي جنب كده بقطر أصغر لغرض فصل الجسيمات بشكل أولي. 


بيشتغل أزاي؟


ولا أي حاجة بناخد بروتون نحطه في انبوبة و بناخد بروتون تاني نحطه في أنبوبة تانية نعرضهم لمجالات مغناطيسية بحيث يتحركوا عكس بعض و نقعد نديهم في طاقة حركة بحيث اننا نسرعهم (عشان كده أسمه مسارع جسيمات) و كل ما يعدي عند المغناطيسات ياخد طاقة حركة أكبر فأكبر احد ما يوصل 14 تيرا ألكترون فولت و هي كافية انها تخلي البرتونات توصل لسرعة أقرب ما يكون لسرعة الضوء أقل بقيمة بسيطة لأن عمليا لايمكن الوصول لسرعة الضوء حتي الأن المهم بعد السرعة الرهيبة ديه بنفتح الانبوبتين علي بعض عند احد نقط التلاقي و هوب بووووم ثقب أسود يبلع الأرض و المجموعة الشمسية كلها ( ديه كانت الأشاعة اللي طالعة عند تشغيل المفاعل في 2010 أنه حينتج من التجربة ثقب أسود يبلع الأرض و الله أعلم حيرمينا فين او ميرميناش!!) و بالرغم ان السيناريو ده مشوق ألا انه محصلش و عدي اول تشغيل للمفاعل بسلام عام 2010.
                        

أستفادوا ايه بقي من ساعتها؟

من وقت تشغيل المفاعل بتجري التجارب فيه لحل ألغاز الكون و معرفة الكونات الدون ذرية في محاولة لفهم نشاة الكون و ازاي حيموت غير فهم المادة و المادة المضادة و الكشف عن اذا كان فعلا في حاجة اسمها هيجز بوزون فعلا ولا لا.
ممكن نسلط الضوء عن أبسط و اهم الأكتشافات اللي ساهم فيها مصادم الهادرونات
عام 2011 تم أنتاج و حبس نقيض الهيدروجين و هو ما يعرف بالمادة المضادة و هو زي الهيدروجين بالظبط بس أكنه باصص في المراية أكتروناته موجبه و بروتوناته سالبه و المشوق في الموضوع انه لو اختلط بذرة من الهيدروجين العادي بيولد طاقة أضعاف اللي بيولدها التفاعل النووي بس للأسف لسه مبيقدروش يخزنوه لفتره طويله ولا بيقدروا يتحكموا فيه لحد دلوقت.
عام 2012 تم أكتشاف جسيم بيتصرف بصورة مطابقة لهيجز بوزون و اللي ممكن نتكلم عنه باستفاضه في مقال تاني بس أكتشافه لا يقل أهمية عن اكتشاف الذرة.
من سنتين تقريبا في نتائج خيالية أنهم و لأول مرة يقدروا يخلوا جسيمات تسافر عبر الزمن بس للأسف كان فيه خطأفي الحسابات هو اللي خلا النتائج تظهر بالطريقة ديه.
و غير أكتشافات كتير تانية تهم مجتمع الفيزيائين وكالة CERN هي اللي قدمت الانترنت للعالم في عام 1988 قام العالم البريطاني بتقديم تصور لربط كافة مراكز الابحاث حول العالم و اللي بعد كده تم أتاحت أستخدام برمجية الWWW و اللي تم تطويرها في CERN لكل العالم.

 كل التكاليف و المجهودات ديه بتخلينا نفهم بنية الكون بتاعنا الفهم بيخلينا نقدر نتحكم و نخلي مستقبل بالبشرية أفضل حواسيب فائقة مواد خفيفة و قوية طاقة متجددة و غير مضرة للبيئة تخلينا نقدر نعكس أثر ال100 سنة اللي فاتوا و مدي الضرر اللي لحقناه بكوكبنا فهم و تطويع الفيزياء يعني السيطرة المطلقة :) .
Written by:Amr Khaled - T.Rex
#AK_TRex
#TRex_Magazine

هذه صفحة حديثة
التعليقات
0 التعليقات