Great White Shark - أنترفيو القرش الأبيض المرعب

Great White Shark - أنترفيو القرش الأبيض المرعب

مستمعينا مساء الخير و هابي ويك أند عليكوا الراجل ده عاملين معاه انترفيو بقالنا كتير بس متمش نشره و لولا أن جده الله يرحمه كان معرفه مكنتش نشرت الانترفيو ده بس حننشره نزولا علي رغبة الجماهير و عشان عشم الحفريات اللي مبيهونش ألا علي البني أدمين.
- يا فتاح يا عليم يا رزاق يا كريم ايه يا ابني فيه ايه جايبني علي ملا وشي و مسيبني أكل عيشي ليه أحنا مش واخدين هدنة من الكلام مع الحيوانات لحد ما يمسكوا الطريشة تاني البت من ساعة ما هربت و حالفة لتجيبني ديه صعرانة أنا مستهدف يا كلاب
-- مهو بص بقي فيه واحد جه كسر الأستوديو و ضرب السيكيوريتي و حالف لا تعمل معاه أنترفيو عافية
- ضرب السيكيوريتي كمان و ده مين الفتوة ده كمان هي كلها بقت أشباح هو فين هو مش عارف أخر واحد سرق عربيتي عملت فيه ايه.
-- أنت بتتكلم علي جون ويك يا ريس بطل فرجة علي الافلام اللي لحست دماغك و خش شوف المصيبة ديه.
- طب تعالا معايا.
-- لا يا عم ديه قعدة أنياب و انا مليش فيها.
- يا جبان مخصوم منك 10 أسابيع.
......
- سلام عليكم ... ايه الميه ديه كلها هم العيال كانوا بيمسحوا ولا ايه.
- سلام عليكم.
-- عليكوا السلام يا سيدنا أنت الديناصور.
- و الله علي حسب.... أيوه صحيح أنا انت ازاي ياض أنت ياض أنت ياض تقتحم الاستوديو و تضرب السيكيوريتي لا و نافخ الpool البلاستيك بتاعي كمان أطلعلي أنا مش شايفك.
-- !!!!!!!!
- أااااااااااااااااااااه ايه ده يخربيتك هو أنت. ده ايه اللي جابه ده.
-- أنت الديناصور اللي حتعمل معايا أترفيو.
- يا عم انا الزفت و بعدين ملهوش لزمة العوق ده يا شبح فيه ايميلات و واتس أب دلوقت كان ممكن تحدد معاد.
-- مفيش وقت للكام الفاضي ده أسألني عن ذاتي و أنا حجاوبك بتواضع.
- لا والله ايه ياض التواضع ده بتشر تواضع و الله حبكي.
-- أقل حاجة عندي.
- أنت جنسك أيه يا عم?
-- ذكر!
- لا مش قصدي ده انا بتكلم نوعك ايه?!
-- سمكة!
 - هو يوم أسود حتنقطني بالكلام احكيلي تفاصيل عنك.
-- أحنا القرش الأبيض واحد من أشرس و أكبر كائنات المحيط  صيتنا مسمع ولو جت سيرة الشراسة أحنا نمبر وان.
- ايه الوقعة السودة ديه انا ربنا رازقني بقرش نرجسي و سرسجي الأتنين بتعيش فين يا ملك.
-- كل حته أي سواحل بتلاقينا راشقين تقدر تقول محتلين تليت الميه اللي في نص الكورة.
- كورة ايه ؟!!
-- الكورة الأرضيه ما بين مدار السرطان و الجدي أحنا بنحب الميه في درجة حرارة 14 - 15 و بنلف نسترزق بقي حسب توفر الأكل و أكتر مكان موجودين فيه هو جزيرة ديير في جنوب أفريقيا حتي مركز أبحاث القروش البيضة موجود هناك عشان يعرفوا تمامي بس محسوبك حويط و بنعرف نهبأ.
- ما شاء الله قرش سرسجي مسجل و تحت المراقبة كمان.
-- تحت المراقبة بس وحياتك ما عارفين يمسكوا عليا حاجة ولا فاهميين أنا بعمل ايه حتي الشريحة اللي مركبينهالي قالي يعني عشان يعرفوا أنا فين و لا فايداهم بحاجة انا بقعد ألف في البحار و المحيطات بقعد في اي حته و انزل علي اعماق و اطلع تاني لا بتفرق معايا الميه برده ولا لا شراييني تحت طبقة جلد سميكة بتدفيني.
- يعني أنت مش بتهاجر عشان الاكل و التزاوج ولا ملكش في الحريم.
-- لا ليا طبعا عيب يا دانص.
- دانص؟!!
-- أه دلع ديناصور.
- سمج! كمل
-- أنا بالرغم أن محدش لحد دلوقت قفشني و انا بمارس حياتي الطبيعية ألا انهم رصدوا ان فيه توقفات كده و أماكن تجمع لينا منهم مكان أسمه مقهي القروش قريب من هاواي كده هم شاكيين اننا بنعربد هناك بس محدش يعرف مش بقولك حويط.
- لا شقي أمال الحريم بتوعكوا بعد الحفلة المش بريئة ديه بيروحوا فين.
-- بتروح لحال سبيلها تاكل و تحمل في البيض بتاعها جوه جسمها لحد ما يفقس 11 شهر و العيال بتبقي أشباح من صغرها ده حتي فيه حكايات ان العيال الأقوي بتاكل بعضها جوه الرحم بتاع أمهم.
- عيلة واطية يعني و لا انتوا أصلا مبتكونوش عيلة أنتوا مش ثدييات أصلا يعني العيل مبيرضعش ولا مؤاخذة يعني.
-- لا مبيرضعش هو شهر مع أمه و يروح يشوف أكل عيشة بقي بيقعد فيهم 15 سنة عقبال ما يقدر يتجوز.
- 15 سنة بيبقي ولد ولود عشان كده بيبقي عصبي و داير يلوش في خلق الله.
-- أحنا مبنلوش في حد احنا كائن مفترس و بنجوع بسرعة انت بالذات مينفعش تحكم علينا يا دانص.
- أحم خلاص يا عم  سكيب أنت بتعيش حوالي متوسط 30 سنة صح.
-- اه 30 سنة شقي و لف في البحار و المحيطات علي زعانفنا بنقابل ناس و نفارق ناس و ماشية الحياة عادي.
- لا و النبي طب انت بتاكل ايه في ال30 سنة دول يا رايق بقي .
-- أحنا بنحب الحاجات الدسمة فقمة ماشي خروف بحر خنزير بحر شوية سمك معديين في سرب لو السلك ضاربنا قوي و بعدين دنا عليا نطة بنط بتاع 3 متر في الهوا و انزل علي القمة من دول أخضها يجيلها صرع و اكولها علي بق واحد.
-عشان كده بتفشل معظم محاولاتك يا موكوس عشان الهبل اللي بتعمله ده واحد غيرك بكل الأسلحه و الغريزة اللي ربنا ادهاله ديه مكنش تعدي منه فريسة.
--قصدك شوية السنان و الفك العملاق و الطول ال 6 متر ده دول لزوم الشو
-لا مش لزوم الشو انت عبيط دنتا بتشم ريحة الفريسة من علي بعد دنتا بتشم نقطة الدم من علي بعد 100 متر في البحر غير أحساسك بالمجالات الكهرومغناطيسية بتاعة الكائنات اللي بتتحرك حواليك دنتا فاضلك شوية و تتقن الهاتسو.
-- يرحمكم الله
-جاهل الهاتسو ديه تقنية بتمكنك من رصد تحركات العدو عن طريق ...
--فكك من السحر الأسود و شغل سبيستون ده أنا سامع أن فيه واحد هنا عالمي أسمه كابر صبحي ما تطلبلنا دليفري
- بطل تسول بقي و بعدين ده معندوش كلاب بحر بطل يعملها خلاص من ساعه ما فتح فرع دبي
-- ربنا يوسع عليه طب أي حاجة من البرنس أنا جي من البحر علي لحم بطني.
- ليه موجبتش مع بني أدمين و فشختيلنا السياحة بزيادة وانت جي.
-- لا يا عم دنتوا الناس عندكوا بياخدوا سيلفي مع القروش مش ناقصة قلة قيمة أنا لا بحب البني أدمين ولا طعمهم لولاش بس سبيلبرج طلع علينا سمعة اننا سفاحيين وقتاليين قتله مع اننا مبنهاجمش البني أدمين الا نادرا يعني هما بتاع 70 حاله في السنة منهم حالة أو اتنين قرش أبيض بس يعني بس هم مكبرين الموضوع شغال سيما بقي.
- يعني أنت مبتحبش طعم البني أدمين و بتجري وراهم ودايما تعض المزة أم بكيني أول واحدة.
-- مش بقولك شغل سيما نوت ماي تيب يا تيري انا بحب الحاجات المربربة الكيرفي البني أدمين مليانين عضم و بيلبسوا حاجات بلاستيك بتوجع بطني و مبتتهضمش و كل الهجمات ديه بتبقي بالغلط أصلا بيبقي شكلهم زي الفقمة من تحت لمؤاخذة
- مممممم ولا أنت خدت أكتر من وقتك وانا مش عارف انا كملت معاك ليه بس عشان جدك الله يرحمه بس.
-- أنت تعرف جدو يا دانص.
- فوق يلا يا سمج واحفظ المقامات أنا من ما قبل التاريخ أيام العظماء الMegalodon خدمنا مع بعض في الجيش ولولا عشم الحفريات كنت هبرتك من زعنفتك و رميتك في الشاطبي علي ضهرك و العيال الشبيحة كان زمانهم عملوا عليك حفلة
مش أنت أسمك قرش أبيض برضه عشان كده مع ان لونك أسود في أبيض زي التاكس أصلا لأن بطنك بيضة ولما لقوك أول مره كنت مقلوب علي ضهرك عشان كده أتسميتي أبيض يا بيضة ده غير حوت الOrca اللي بيحط عليك.
-- أيه ده أنت سايبني اعث فسادا و اقل في أدبي وانت عارف قاذوراتي كلها  يا سيد الناس حقك عليا و الله أنا أصلا دخلت عن طريق النيل غلط شبكت في صنارة بوص و كان صاحبها حالف يعملني سنجاري أنا أسف.
-ولا يهمك متخفش و تعالا معايا طيب حرجعك أسكندريه و حنروح ناكل من عند حودة جندول.
-- بجد و الله ربنا يطعمك ما يحرمك يا هندسة بس هو ايه السنجاري ده.
-لا ديه حخلي حودة يقولهالك اه لازم تسمن و تربرب كده أشكلك خاسس و مش حتنفع صنية.
-- ايه؟!
- تاكل صنية يعني تعالي معايا بس.
- يا عيال الغدا علي حسابي و حد يكلم جعفر يجي عندنا حفلة.....
Written by:Amr Khaled - T.Rex
#AK_TRex
#TRex_Magazine




هذه صفحة حديثة
التعليقات
0 التعليقات