بالونة Pi Network

بالونة Pi Network

أنتشر عالسوشيال ميديا مؤخرا دعوات من أشخاص كثيرين لتحميل برنامج أسمه Pi Network و أنه ازاي عن طريق الأبليكيشن البسيط ده تقدر تعمل تعدين لعملة رقمية جديدة أسمها Pi  وتبقي من أصحاب الملايين و تلحق بركب أغنياء العملات الرقمية بدون أي مجهود و بموبايلك بس تقدر تعمل تعدين لعملة رقمية زي عملة البيتكوين المشهورة اللي كنا اتكلمنا عنها قبل كده و انها ازاي قدرت تحقق ثروة كبيرة لأوائل الناس اللي أهتموا بيها و عرفوا يستغلوا مواردهم للكسب من ورائها.
مبدايا نحب نوضح أن طرق الثراء السريع معروفة و أغلبها شمال (مخدرات و سلاح  .....الخ) و ليها أضرارها و عواقبها دينيا و دنيويا و أخلاقيا, ففكرة أن حاجة تجيب فلوس كثير من غير تعب ديه ده عبث و لعب بأحلام الناس خصوصا في الظروف الصعبة اللي أحنا فيها ديه. 

بس زي ما اتعودنا معاكوا دائما أحنا بنحب نفهم, بنمسك الحاجة نفصصها و نحللها عشان نبقي فاهمين أحنا بنقبل أو بنرفض ايه بالظبط, نبدأ كلامنا بشوية اسأله و نحاول ندورلها علي أجابات بالأستعانة بالمصادر اللي هتلاقيها في أخر الموضوع.

يعني أيه عملة؟

مبدأيا العملة اللي نعرفها في صورتها الورقية ده عبارة عن تعهد من مصدر العملة أيا كانت الجهة و بتكون حكومة عادتا أن انت تملك قيمة معينة من الذهب أو المعادن أو العملة الأجنبية (اللي بدورها بيكون ليها قيمة معينة في بلدها من الذهب أو المعادن) و لسهولة التعامل بدل ما تمشي بسرة من الدنانير الذهبية او السبائك هي بتديلك ورقة ضمان من عندها انك تملك شئ ذو قيمة معينة و عن طريق المقايضة بالورقة ديه تقدر تشتري أو تبيع.

يعني أيه عملة رقمية؟

بأختلاف الأحتياجات و ظهور متطلبات جديدة  غير الأكل و الشرب و الأقمشة ظهرت سلع محدش كان ممكن يصدق انها هيبقي قيمة في يوم من الايام حاجة من الحاجات ديه كانت البيانات أو الداتا بس مش الجيمز أو الافلام اللي عندك عالكمبيوتر مع أنك لو فكرت ليها قيمة برضه لكن ده مش موضوعنا,أحنا بنتكلم عن بيانات زي بتاعت الحسابات و التداول التجاري بين الناس او الجهات المختلفة
العملة الرقمية ديه قائمة علي البيانات ديه أكتسابك ليها مش لأنك بتملك أحتياطي ذهب أو غيره لا أمتلاكك ليها بيكون عن طريقتين أنك تعملها تعدين أو تشتريها بشكل مباشر من حد عمل عملية التعدين ديه.

يعني أيه تعدين؟

التعدين اللي نعرفه هو عملية أستخراج المعادن من باطن الأرض في صورته الرقمية هيبقي (معالجة بيانات) ديه المعادن النفيسة 

و استخدام قدرة الحاسوب بتاعك هو المقابل اللي انت بتقدمه عشان تحصل علي المعادن النفيسة الرقمية ديه

طب أيه نوع البيانات اللي بعالجها خواريزمات معقدة و مشفرة منها بيانات العملة نفسها و المستخدمين و عمليات التبادل التجاري اللي بتتم بينهم أيا كانت البيانات هي مقسمة و  مشفرة بحيث انها عملية مستحيل يقدر حد يتتبعها او يخترقها لأن مفيش سيرفر أو مكان معين ببتواجد فيه البيانات ديه.

أيه Pi Network و مين اللي عملها؟

برنامج و ألجوريزم الذكاء الأصطناعي الPi Network تم أبتكارها بواسطة فريق من 3 أشخاص من جامعة ستانفورد و هم
Dr. Nicolas Kokkalis - Head of Technology
Dr. Chengdiao Fan - Head of Product
Vincent McPhillip - Head of Community

وفقا لتعريفهم للبرنامج هو عملة رقمية جديدة وجدت عشان تتلافي مشاكل البيتكوين و تتيح للمستخدم العادي أنه يقدر يعمل عملية التعدين عن طريق تليفونه المحمول أو جهازة الشخصي وده اللي مبقاش متاح دلوقت مع عملة البيتكوين او مبقاش جايب همه أن صح التعبير.كل المطلوب منك تشغل الأبليكيشن علي التليفون تقدر تحمله من المصادر و تعمل ريفريش كل 24 ساعة مانوال عشان يضمن أنك شخص مش بوت.
المفروض أن عملية التعدين بدأت من عدة شهور و هتتوقف تماما في شهر أغسطس كمرحلة أولي
قيمة العملة حاليا صفر و ده هم موضحينه تماما أن أيا كان عدد الPi اللي أنت قدرت تجمعه لحد دلوقت هو ميسواش أي حاجة و مش هيبقي ليه قيمة لحد ما تتوقف عملية التعدين و يتم تقيمه في شهر أغسطس ده لو حصل.

أيه الفرق بين Pi و Bitcoin؟

هنعمل مقارنة سريعة كده باللي نعرفه و مش مزايا و عيوب فروق بس
- الPi تم أطلاقها بواسطة أشخاص معروفين البيتكوين لا
-الPi تقدر تعمل تعدين علي الموبايل او أي جهاز أيا كانت أمكانياته طالما متوصل بالنت , البيتكوين محتاج جهاز فشيخ
-الPi بتسجل فيها برقم تليفونك أو اكونت الفيسبوك و ده غريب بالنسبة لعملة رقمية  بالصورة اللي اتعودنا عليها علي عكس البيتكوين اللي هويتك فيها مجهولة بالكامل أنت مجرد رقم
-الPi قيمتها صفر حالياو حتي مرحلة نهاية التعدين , البيتكوين قيمته 9544 $ تقريبا وقت كتابة السطر ده
-الPi محددة وقت معين لنهاية التعدين بينما البيتكوين محددة نهاية التعدين بعدد وحدات و هو 21000000 وحدة تم تعدين 18000000 وحدة تقريبا حتي الان
-الPi بتقل قيمة التعدين وقت مقابل الPi مع مرور الوقت يعني كل ما نقرب من معاد وقف التعدين للمرحلة اللي احنا فيها دلوقت بتقل قيمة Pi/hr كل ما يكثر عدد اللي بيعملوا تعدين أو ال Pioneers زي ما بيسموهم بتقل قيمة الPi/hr علي الكل
ال Bitcoin/hr بيحددها قوة الأجهزة المشاركة في عملية التعدين و الأقوي هو اللي بياخد نصيب الأسد
-لو أفتكرت حاجة تانية هكتبها

ايه هي المخاوف االلي حذر الخبراء منها؟

-أن بعد كل الوقت اللي هتضيعه في التعدين تطلع العملة فشنك و نصباية لأنهم ببساطة لا هم وعدوك بحاجة ولا ملزمين ناحيتك بأي قيمة لل Pi اللي أنت عملتله تعدين
-خبراء امنين حذروا ان أنت بتديهم المفتاح لسرقة بياناتك عن حب أنت مديهم رقم موبايلك أو أكونت الفيسبوك بتاعك غير صلاحيات الدخول اللي بيطلبها أي أبليكيشن زي الحصول علي سجل الهاتف مثلا. البيانات ديه ممكن يتم أستخدامها في بيعها لقنوات تسويقية أو الأسوء التأثير و التلاعب بالرأي العام و الأنتخابات زي ما حصل في أمريكا مع الفيسبوك.
-أنك تهلك الجهاز بتاعك و يسخن منك أو تسحب أنترنت كتير و ده نفاه القائمين علي العملة لأنهم كانوا عايزين العملة تبقي صديقة للبيئة مبتستهلكش طاقة عالية زي البيتكوين و اللي جربوا الموضوع لحد دلوقت من الخبار بيقولوا انه أستهلاكه لطاقة الجهاز و الانترنت معتدل جدا زي اي تطبيق (تحت التجربة الشخصية)
-مؤخرا بدأ يظهر أعلانات علي الأبليكيشن و ده غريب شوية من وجهة نظري لأن أيا كانت أرباح الاعلانات مقابل المستقبل الواعد اللي هم شايفينه للعملة بيحط علامات أستفهام شوية ليه تحط أعلانات في مرحلة بدري قوي كده ولا انت شايف انها مش هتجيب همها فبتلم أي أرباح و خلاص؟!!!

طب أنا عايز أجرب!

هو أنا مفيش طريقة أقدر اجرب بيها من غير ما أدخل نفسي في مخاطرة مش يمكن تظبط و نعوم علي وش الفتة؟!!
مبدايا بلاش ده اللي حذر منه كل الخبراء لأنه بنسبة كبيرة هيطلع نصباية أو مش هيجيب همه عالأقل و مش هيحققلك الثراء اللي بتحلم بيه يعني مش هتبقي الوحدة ب500$ او 800$ زي ما الناس اللي بتسوق للموضوع بترزع
-رقم واحد لو خايف علي بياناتك متعملش تعدين من الجهاز الاصلي بتاعك اللي عليه صورك و حساباتك أو أيا كان الداتا اللي ممكن تخاف عليها شوف أي موبايل قديم أيا كانت قدراته مش هتفرق.
-أختار تسجل برقم التليفون مش بالفيسبوك
-متستعملش الأبليكيشن من SimCard بتستخدمه كتير
-مينفعش الشخص الواحد يكون ليه أكتر من أكونت بيعمل بيه تعدين بس بيسمحلك بحاجة أسمها Secure Circle دايرة معارف وجودكوا مع بعض او تحت بعض و استخدامكم لكود بعض في التسجيل بيعلي قوة التعدين.

أحنا قررنا نخوض التجربة من باب المغامرة و ده الكود بتاعنا trexhunterx.
و ديه كل المعلومات اللي وصلنالها لحد دلوقت و هنشارككم نتيجة تجاربنا في الأيام اللي جاية و نحاول نصحح لو فيه حاجة غلط او نضيف معلومات جديدة.

تحديث 1: بعد التجربة لمدة أسبوع (جهاز متفرغ خصيصا للتجربة)

-أستهلاك النت قليل جدا لاول أسبوع

-الجهاز مبيسخنش زي ما الناس أدعت 
-البطارية قعدت اسبوع تقريبا بدون أستخدام التليفون الا للغرض ده

-مطلبش صلاحية الدخول غير لجهات الأتصال لما طلبت انه يدور مين أعرفه بيستخدمها و ده طبيعي و من حقك ترفض

-ممكن تقفل عرض الاعلانات علي الابليكيشن لو حابب وفقا لموقعهم بيقولوا ان ده لدعمهم لو انت عايز 

-بعد 3 جلسات تعدين (3 أيام) بتقدر تبقي Contributer و ده ممكن نتكلم عنه وقت تاني

-بيعرض عليك أنك تنزل ابليكيشن تاني علي الكمبيوتر الشخص و تبقي حاجة أسمها Node (بلاش ألا لو عندك جهاز مبتستخدموش و ديه لسه مجربتهاش)
-ال Contributer و ال Node بيعلوا قدرتك علي التعدين بس في المقابل بتديهم سماحية الوصول لجهات الأتصال بتاعتك و جهاز الكمبيوتر الشخصي.

-هيتم التحديث لو في أي معلومات جديدة

Written by:Amr Khaled /T.Rex 

#TRex_Magazine
#AK_TRex

المصادر:Bitcoin

Pi Network

AI ذكاء أصطناعي

Pi App

رأي الخبراء 1

رأي الخبراء 2

ماذا نعرف عن Deep Mind - AI Google

ماذا نعرف عن Deep Mind - AI Google

قبل 2014 تقريبا مكنش حد يعرف حاجة عن الشركة ديه الا المتخصصين و الباحثين في المجال الذكاء الأصطناعي AI او الMachine Learning عمتا اللي خلاها تتشهر و تبقي واحدة من الشركات الرائدة في المجال ده كان استحواز جوجل عليها عشان تبقي فيما بعد جزء من مجموعة Alphabet  أنجح كيان في قطاع التكنولوجي علي مستوي العالم و المالكة لGoogle و Android و Boston dynamics وBlogger و شركات تانية كتير.

ظهرت Deep Mind في 2010 علي يد Demis Hassabis, Shane Legg and Mustafa Suleyman بأسم ديب مايند تكنولوجيز و طورت نظام ذكاء أصطناعي بيستمد في نظرية عمله علي الشبكات العصبية زي المستخدمة في أله Alan Turing  و اللي كنا اتكلمنا عنه في موضوع قبل كده قدروا يصنعوا لنفسهم نسخة متقدمة من أله تورنج اللي بتحاكي الدماغ البشرية من حيث وجود ذاكرة قصيرة الأمد و ذاكرة طويلة الأمد و الاتنين بيعالجوا الداتا المخزنة عليهم اللي بيخليه يقدر يتعلم و مناسب تماما لتطبيقات الMachine Learning. 
الناس ديه خلت الذكاء الأصطناعي اللي هما برمجوا الخوارزمية الأساسية بتاعته أنه يلعب جيمز. أه و الله زي ما بقولك جيمز .ثواني هو مش متبرمج يلعب لعبة معينة لا ده زيه زيك بالظبط بيبدأ يلعب اللعبة و يقع و يعيد المحاولة و يحاول يشوف المرحلة بتتعدي أزاي عن طريق التجربة و الفشل و التكرار عدد لا نهائي من المرات بداو بألعاب بسيطة بتاعة الأتاري زي Chicken invaders المعروفة شعبيا بحرب الفراخ و بدأت الالعاب تبقي معقدة اكثر وبعد أستحواز جوجل بدأ يتعلم ألعاب ذهنية ذاتيا زي الشطرنج و الشوجي و أخيرا GO و مع كل لعبة كان بيلعبها كان بيطور استراتيجيات معقدة أكتر بسبب زيادة الاحتمالات بعد كل حركة يكفيك انك تعرف ان عدد الاحتمالات عشان تعمل استراتيجية و تكسب في GO أكتر من عدد ذرات الكون المعروفة و برغم كده Alpha و من بعده Alpha Go قدروا أنهم يهزموا بطل العالم في اللعبة و صاحب الرقم القياسي و اللي اعتبره علماء و مهندسوا الذكاء الأصطناعي أنه طفره في مجال الذكاء الأصطناعي أنه قدر يتغلب علي العقل البشرية في حاجة من صنعه معمولة عشان تتحدي الدماغ البشرية.

طب و هي جوجل أشترت شركة بصفقة قدرت بنصف مليار دولار عشان تلعب؟
لا طبعا التقنية اللي بيستخدمها ديب مايند في تعلم الألعاب و تطوير الأستراتيجيات تخليه يقدر يتعلم اي حاجة تقريبا حتي أنه بيقدر يطور خوارزميات لجوجل يعمل تجارب علمية في مجال الكيمياء و الجينات في الواقع الافتراضي بدون الحاجة لأختبارها عمليا يألف موسيقي و يكتب شعر و يرسم لوحات لا و كمان يقدر يحسن من الكود اللي هو مكتوب بيه أحسن من أي مبرمج في جوجل!!!
متخافوش الموضوع أمن بالكامل* الكلام ده جه علي لسان المسئوليين في ديب مايند و اللي بيزعموا ان كيان ديب مايند كل اللي بيتعلمه و بيغيره خاضع تماما للمراقبة و بيخدم اهداف الباحثين في البرنامج و بيوجه يتعلم ايه و امته ( قال يعني هو مش ممكن يشتغلهم زي روبوتات الفيسبوك) المهم انهم شغالين علي Kill switch عشان لو ديب مايند قرر يقل بعقله ويعمل زي Vikki ,Altron او Eagle eye يقتلوه علطول  .

ايه انجازات ديب مايند في ال3 سنين اللي كانت فيهم تحت مظلة جوجل؟
زي ما قولنا ديب مايند بيتعلم من تلقاء نفسه عن طريق انك تديله هدف بيحاول عن طريق التجربة و الفشل انه يوصله
قدرت جوجل انها تخلي ديب مايند يحسن من نفسه يعيد برمجة اكواد في جوجل نفسها عشان يوفر في المساحة و الطاقة في سيرفرات جوجل و بالتالي نجح انه يوفر 50% من الداتا و شغال عالبور و بيعمل علي تحسين أكتر للنتايج ديه.
ديب مايند أستخدم في أكتشافات علمية طبية زي انه قدر يمسح قرنية أكتر من مليون شخص عشان يتدرب علي تشخيص علاج العمي المصاحب لبعض مرضي السكر و اللي اكتشافه مبكرا بيؤدي الي علاجه بس الفكرة ان المريض مبيبقاش عارف انه مصاب بيه و بيفقد بصره الا بعد الفحص عن طريق متخصص وده حتلغيه ديب مايند قريب لما يخش المريض يمسح عينه بكاميرة موبايله و يعرف انه سليم او مصاب.
عمليات محاكاة لعلاج السرطان و الامراض المختلفة اللي يقدر ديبميند يعملها في وقت صغير كفيلة انها تعالج و تنقذ ناس كتييير جدا بيموتوا كل يوم.
روبوتات ديب مايند بتحلم بمعني انها و هي مش بتنفذ التاسكات بتاعتها في وضع Standby بتطور من اللي اتعلمته و هي شغالة و تحاول تعلي كفائتها في المهمات بتاعتها زي البني أدم و هو بيحلم بالظبط (West World) فحت بقي.
 جوجل بدات تجمع بيانات طبية لملايين المرضي حول العالم عشان سبب مجهول غالبا حيتم توظيف ديب مايند كطبيب و حيقعد الدكاترة في بيوتهم و كذلك المحاميين بعد ما قدر يعالج بيانات القوانين بطريقة بدائية و يحل قضايا أستنادا علي المعطيات اللي عنده
ديب مايند بيتعلم في الواقع الافتراضي ازاي يتعامل في البيئات المختلفة المشي الجري تخطي العوائق و خلافه و اظن واضح أثر ده علي تطور روبوتات جوجل بلا ادني شك.

Deepmind قفزة أستثنائية في مجال الذكاء الاصطناعي.
Deepmind مفيد جدا لمستقبل البشرية و حل المعضلات اللي بنواجهها و حنواجهها في المستقبل.
Deepmind مرعب و اي غلطة بسيطة فيه ممكن تأدي لنهاية الكوكب.

كان معكم #AK_TRex مراسل #TRex_Magazine من مختبرات T.Rex التقنية.

Written by: Amr Khaled
#AK_TRex

خلق البعض لتشكيل عالمنا - ألان تورنج

خلق البعض لتشكيل عالمنا - ألان تورنج

ألان تورنج Alan Turing هو مبتكر فكرة أختبار تورنج Turing Test و ......
أختبارات ايه بس أحنا فين و الأمتحانات فين ما تفتكرلنا سيرة عدلة و مين تورنغ ده أصلا اللي عامل أختبار ده كمان أنا بدأت اتشائم.
ثم منا ممكن اعمل اختبار و أسميه أختبار أشرف ايه الاسهام العلمي في كده.
طب أكمل كلامي... مبدأيا متخافش مش الأختبارات اللي بالك فيها ديه يكفينا الشر و تورنغ اللي مش عاجبك ده هو سبب من أسباب أنك بتقري الكلام ده دلوقت.

الان تورنج هو عالم أنجليزي ولد عام 1912 بسبب ظروف عائلية قضي معظم طفولته في دار رعاية برغم من أن عائلته علي قيد الحياة. درس الكيمياء العضوية و أنهاها بشكل كامل و هو عنده 13 سنة . برع في الكيمياء و الرياضيات و قدر انه يفصل الايودين عن الاعشاب البحرية و يثبت الدالة المثلثية المعكوسة قبل ما يتم 15 سنة.
درس ألان تورنج في جامعة بريستون و اتخرج 1938 مفيش سنة و بدأت الحرب العالمية الثانية 1939 اللي ساعد في أثنائها فك شفرة النازيين بفضل خبرته في الرياضيات و الحواسيب.
ثواني بس حواسيب ديه اللي هي كمبيوترات انت حتشتغلنا كمبيوتر ايه اللي موجود في الحرب العالمية الثانية ديه؟؟!
تقدر تقول ان الان تورنغ هو من الرواد في مجال الحواسب و بينسب ليه الفضل في أبتكار فكرة الكمبيوتر و تطوير أول أله تقدر تحل حوارزميات و عمليات حسابية معقدة كانت بتاخد من البشر شهور و سنين في حلها و قدم للحلفاء وقتها ما يعرف باله تورنج و اللي كانت من اسباب فوز الحلفاء بالحرب العالمية الثانية.
 تم تجسيد قصة الان تورنج و فك شفرة النازيين عن طريق  Enigma Machine تم انتشالها من احد غواصات النازيين
في فيلم" The Imitation Game" عام 2014.

اله تورنغ ظهرت للنور لأول مرة في ورقة بحثية نشرها الان تورنج 1936  بعنوان "on computable numbers" عرض وقتها فكرة الحسابات المميكنة تخيل ألان تورنغ انه بقدر يبقي عنده اله قادرة علي التعامل مع شريط مغناطيسي زي بتاع الكاسيت او الفيديو و انه يقدر يكتب عليها (0,1) لغة الأله او الBinary code و تقدر الاله ديه تكتب و تمسح البيانات ديه و الغرض منها كانت انك تديها عملية حسابية معينة وبعد اجرائها لسلسلة عمليات و تبديل بين الشرايط و التجربة انها تقولك العملية ديه قابلة للاجراء ولا لا. بس الجميل ان اله تورنج تقدر تعمل كل اللي بتعمله الكمبيوترات بتاعتنا دلوقت بس بشكل بدائي و مبسط.

 عام 1945 قدم اول نموذج للحاسب الالي بسعة تخزينية 4kb و ده كان انجاز علمي وقتها بمخبر الفيزياء بلندن.

و في عام 1948 قدملنا تورنغ اول جهاز كمبيوتر في العالم قابل للبرمجة اثناء عمله بمختبر الحاسوب بمانشستر.
عمل بعدها تورنج عدة ابحاث بأستخدام خبرته في الحواسيب و الكيمياء العضوية في اختبار صيغ الكيمياء الحيوية و محاكاة التركيبات المختلفة عن طريق الحواسيب بتاعته.
 في عام 1948- 1950 نشر الان تورنج كتاب بعنوان "Artificial intelligence -A philosophy Introduction " و ديه اول مرة يستخدم فيها المصطلح المرعب ده الذكاء الأصطناعي.
في كتابه حدد تورنج اليه عمل الاله و عرض ازاي بتفكر و بتتبع الخوارزميات بتاعتها و بتنفذها و هل فعلا ممكن توصل الاله لمستوي ذكاء الانسان و هنا بدأ يشرح أختبار تورنج.
أختبار تورنغ هو أختبار من تصور الان تورنغ عن كيفية التفريق بين الانسان و الاله بمعني اكتر وضوحا ازاي اعرف اني بكلم انسان مش ذكاء اصطناعي.

 اختبار تورنج Turing Test ببساطة في شكله اللي تخيله الان تورنج بيتكون من 3 حواسيب 2 بيتحكم فيهم بشر و شرط انهم يكون ملمين المام تام بالحواسيب  و التالت ذكاء أصطناعي, واحد من البشر هو اللي بيعمل الاختبار بأنه بيبدأيطرح أسئلة عن طريق الحاسوب بتاعه للحاسوبين التانين و بيدا الانسان التاني يرد عن طريق الحاسوب بتاعه و نفس الكلام الذكاء الاصطناعي و في أخر الاختبار بيحدد الحكم اللي بيستجوب الكيانين اللي قدامه انه يحدد اي الكيانين بشري و ايهم ذكاء اصطناعي.
الموضوع صعب لأنه بيعتمد علي العنصر البشر و خبرته  بس مظنش ان حد يقدر يحكم بصفة البشرية او الادراك الذاتي غير كائن مدرك.
بس الموضوع فيه ظلم اكيد الكمبيوتر حيبقي متفوق في اسئلة الارقام و المعلومات عن الانسان العادي بس الموضوع حيبقي معقد اكتر لما تتطور الاسئلة لحاسس بايه او بتفكر في ايه مثلا او حاجة زي عارف فيلم تيتانيك و اللي حيبقي بالنسبة للكمبيوتر مجرد داتا حيجيبها من علي الانترنت فحين الانسان حيقدر يوصل فهم اعمق للقصة الرومانسية و المشاعر المتناقضة و المأساويات و مشهد روز و مشهد الحنطور ده جزء من الادراك اللي بيخلينا بشر.
هل فيه ذكاء اصطناعي نجح انه يعدي أختبار تورنج قبل كده؟؟؟؟؟!
حصل برنامج "يوجين جوستمان Eugen Goostman" هو برنامج ذكاء اصطناعي تم تطويره بواسطة "فلاديمير فيلسيوف ويوجين ديشمينكو وسيرجي ألاسين"  و هو عبارة عن برنامج محادثة بيحاكي طفل أوكراني عنده 13 سنة و اللي قدر يقنع 33% من الحكام انهم بيكلموا طفل فعلأ و ديه نسبة كبيرة جدا محصلتش قبل كده مفيش ذكاء اصطناعي اجتاز الاختبار قبل كده اصلا ولو ب1%. حصل الكلام ده سنة 2014 في الجمعية الملكية البريطانية.
و ده بيخلينا نسأل هل فعلا أختبار تورنغ بقي عملي خاصتا بعد أنتشار الMachine Learning أو تعلم الاله انت نفسك أكيد اتعاملت مع Chat bot من بتوع الفيسبوك زي احكيلي حدوتة .....
الbots ديه مسبقة البرمجة انها ترد عليك ردود معينة بس الهدف منها للفيسبوك انها تتعلم منك الكلام و طريقة التفكير و المصطلحات و أحيانا بيحصل انها تتطرف و تطور لغتها الخاصة زي اللي حصل قبل كده مع أحد برامج و حكيناه في المقال ده"شد الكبس بسرعة - AI"
لو عايز تفهم أختبار تورنج بصورة درامية و مستقبلية اكتر أتفرج علي فيلم Ex Machina.

توفي ألان تورنج عام 1954 منتحرا بتفاحة مسممة بمادة السيانيد بسبب أتهامه بالشذوذ و اللي كان بيتعامل وقتها انه مرض نفسي و تم تخييره بين الحبس او العلاج الا انه فضل العلاج اللي سببله أكتئاب و قرر الانتحار.
الأسطورة بتقول ان سبب اختيار التفاحة كشعار لأبل يرجع لتفاحة ألان تورنج بس تم نفيها من مسئوليين أبل.
غريب أنك تلاقي شخص بيفكر في حاجة و بيتنبأ بالتطور اللي ممكن يوصل ليه أختراعه اللي لسه كان بيخطو خطواته الاولي بس ده مش غريب لما يكون الشخص عبقري و ربنا جعله من اسباب خلقه انه يشكل عالمنا.
كان معكم #AK_Trex من أمام احدي شاشات الحاسوب (فكر كده مش ممكن اكون AI).

Written by:Amr Khaled - T.Rex
#AK_TRex
#TRex_Magazine

أستراليا AI في مواجهة القروش

أستراليا AI في مواجهة القروش

قارة أستراليا هي عبارة عن جزيرة ضخمة بتنتشر فيها الشواطئ بعدد11000 شاطئ تقريبا  و هو أكبر عدد شواطئ في العالم لدولة واحدة.
أحد مصادر الدخل في أستراليا و أهمها هو السياحة بسبب أن الشواطئ بتاعتها بتنضم لقائمة أجمل شواطئ العالم لنقاء الميه و كمان بيتمارس فيها رياضات بحرية كتير زي ركوب الأمواج و سباقات الزوارق السريعة..... و غيرها بس أستراليا عندها مشكلة أن شواطئها علي بحر مفتوح أو محيط بمعني أصح و ده بيخلي رواد شواطئها عرضة للتعرض لهجمات القروش و بتتصدر القائمة بعد الولايات المتحدة بنسبة 32% من هجمات القروش في العالم بمعدل 26 حالة سنويا.

بغض النظر أن ده مبيخليش السياحة عندهم تنهار لأن معندهمش ناس بتسوق للسلبيات و تتاجر بيها في كل حته زي عندنا و بتكبر المواضيع و تخليها أزمة أقليمية بدل ما تحلها بتبقي عايزاها تولع و خلاص عشان تزود ترافيك علي قنواتها. بجانب أن تعامل الدولة مع الموضوع ده بيتم بحرص شديد علي أرواح المواطنين و السياح علي حد سواء في دراسات بتتم عندهم و بيتم تتبع و تحديد أماكن تواجد القروش بجانب أن فيه دوريات بتلف السواحل و بيتم رصد أي قرش ممكن يشكل خطورة علي رواد الشواطئ.
بس بعد كل الجهود ديه رقم 26 حالة هجوم و نسبة 32% بيدوا أنطباع لنسبة قليلة من السياح من الخوف خاصتا بعد أنتشار أفلام زي سلسة الفك المفترس و توابعها.

هنا كان دور جامعة سيدني للتكنولوجيا و اللي زي ما المفترض أن البحث العلمي دوره الوقوف علي مشاكل المجمتع و حلها و ده اللي حصل بالظبط. عملت ايه جامعة سيدني بقي؟!
صمم المهندسون بجامعة سيدني ذكاء أصطناعي قادر محمول علي متن طائرة بدون طيار و عن طريق كاميرا عالية الدقة و بفضل الخوارزميات اللي أتصمم بيها ال ذكاء الاصطناعي بتقنية شبة تقنية التعرف علي الوجوه كده. بيقدر أنه يعمل مسح بصورة أكبر للسواحل و يحدد نوع الحيوانات المائية اللي موجودة في نطاق المسح ده و ده لأن البحر عندهم نقي جدا المية معدنية من الأخر.

بتقدر الطيارات ديه و اللي أسمها Little Ripper  أنها تتعرف علي القرش و تحدد هو من النوع الخطر ولا لا و عليه لو رصدت نشاط بشري جنبه بتطلق سرينة صوتها عال جدا عشان تنبه اللي بيعوم و في تصميمات مستقبليه حتكون مجهزة بقارب مطاطي ذاتي النفخ تقدر ترميه عشان تنقذ الشخص المعرض للخطر.و حسب تقرير من وكالة رويترز أن دقة راصدين القروش البشر بتبقي حوالي من 20 ل30% بس بعد أستخدام الذكاء الأصطناعي قدروا أنهم يوصلوا الدقة ل90% و ده تحسن كبير جدا.
الذكاء الأصطناعي مش هو اللي حيدمر الكوكب اللي البشر بيعملوه بالذكاء الأصطناعي هو اللي بيحدد هل هو فعلا خطر و لا يقدر ينقذ حياة ناس كتير جدا لو تم توظيفة بالصورة الصحيحة في النهاية ده حيرجع لضمير البشرية اللي أنا شخصيا مبراهنش عليه.
كان معكم #TRex_Magazine من مقر خفر السواحل بجوار أحد الكناغر.
أسيبكم مع الفيديو

شد الكبس بسرعة AI

شد الكبس بسرعة AI

فاكرين لما اتكلمنا قبل كده عن موضوع الذكاء الاصطناعي و قولنا اقتل الوحش و هو صغير ده فعلا اللي عمله فيسبوك في اتنين من البرامج بتاعته اللي بدأوا يتصرفوا بطريقة غريبة خارج برمجتهم و حتي خارج التوقعات.

اللي حصل ان بوب وآليس  كانوا جزء من سبع برامج تانية قام ببرمجتهم مبرمجي فيسبوك عشان يحسنوا التواصل في السوشيال ميديا و كان الهدف انهم يتكلموا مع بعض و يتعلموا التفاوض و يطوروا من نفسهم اكنهم بيبيعوا و يشتروا حاجات من بعض و يفاصلوا و يحاولوا يوصلوا لصفقة مربحة.

اللي حصل بقي ان في اتنين من البوتس او البرامج ديه قرروا انهم يلاقوا وسيلة احسن للتواصل و بدأوا يطوروا لغة خاصة بيهم بحيث انهم يقدروا ينجزوا و يربحوا صفقات اكتر من باقي البوتس تقدر تقول عملوا رباطية مع بعض😂.
المبرمجين اكتشفوا الموضوع ده لما لقوا لغة الحوار مبقتش مفهومة لان المفروض انهم بيتكلموا انجليزي شبه بدائي بدل كده بقوا بيكرروا كلمات معينة ساعات مرة و ساعات اكتر اللي اكتشفوا بعد كده ان ده بيدل علي عدد الايتمز المتوفرة و سعرها بس بالمستخبي عشان محدش يعرف يفهمهم الجميا كمان ان في جمل المبرمجين مقدروش يوصلوا هما البوتس قصدهم بيها ايه.😓
تم شد الكوبس وقتي و تم قتل الوحش و هو صغير والا كان ممكن يوصلوا ان يبقي عندهم اجندتهم الخاصة و يسيطروا علي اقتصاد العالم او يسببوا خساير فادحة في الأسواق خاصتا بعد بدأ الاعتماد علي العملات المعماة زي البيتكوين كده محدش حيعرف ان بوتس هما اللي ورا الموضوع ده.😨😱😨😱😨😱
#TRex_Magazine

هذا العالم ابغض من ان يتحمله روبوت - انتحار K5

هذا العالم ابغض من ان يتحمله روبوت - انتحار K5

سبق و اتكلمنا قبل كده عن تطور الذكاء الاصطناعي و ان ازاي ان كل يوم في جديد بسبب تقنيات التعلم الذاتي و ازاي سمحت للروبوت انه يبقي زي الطفل الصغير بيتعلم بالمراقبة و التلقين و الفضول و بيكتسب الخبرات و بيتعرف علي الطرق المثلي للتعامل مع العالم البغيض اللي احنا عايشين فيه.
و مع انتشار الروبوتات و كفائتها المزعومة في العمل دأت تدخل الخدمة بالفعل حتي في الوطن العربي زي الروبوت بتاع شرطة دبي.

 بس لما تفتح الاخبار وتلاقي بالبنط العريض خبر انتحار روبوت بتقف شوية مع نفسك كده و بتفتكر الأدوات اللي بدأوا يدوها للروبوتات عشان يطوروا من مهارتهم عن طريق الMachine Learning و ازاي ان الروبوتات بدأت تقيم المحيط بيها و تلاقي طريقة بيرفيكت عشان تقوم بالوظيفة اللي اتعملت علشانها و تطور قدرتها كل ما بتقدم في الشغلانة بعد كده حتشتري الربوت بالCV بعدد سنوات الخبرة😂.

المأسوف علي شبابه K5 هو روبوت تم تطويرة عن طريق شركة Knightscope المتخصصة في استخدام التكنولوجي في مجال انظمة الامن الالكترونية و اللي بتستخدم تقنيات متقدمة و واعدة في المجال ده.
K5 اطلقته الشركة في عام 2013 بشكل فريندلي شبه R2 بتاع ستارورز عشان يبقي مألوف للناس.

تم اطلاقه بعدة مميزات اهمهم حاجتين اعتمدوا عليها في الماركتينج بتاع الروبوت:
1-الروبوت بيشتغل 24 ساعة من غير ما بيتعب ب7$ في الساعة لانه بيتآجر مش مضطر تشتريه بتمن كبير.👌
2- الروبوت مش زي السيكيوريتي الانسان بيزهق او بيدخل الحمام او بيطلع يشرب سيجارة و ينفض للخدمة او يطلع يضرب سندوتش و حجر عالقهوة اللي قدام الشغل.😂
باختصار الروبوت هو السيكيوريتي البيرفيكت اللي بتحلم بيه اي منشآة في ظل الاحداث الجنونية اللي بتحصل في العالم المتخلف اللي احنا بقينا عايشين فيه ده.
في خلال ال24 ساعة K5 بيعمل ايه او ايه مميزاته
- مزود بكاميرا 350° HD مرتبطة بقواعد بيانات المجرمين و اللي لو شاف مشتبه بيه بيبلغ السلطات فورا و بيسلمه تسليم اهالي نفس الكلام بالنسبة لارقام لوح السيارات.

-فيه ميكروفونات حساسة جدا بتقدر تمييز الاصوات و بتقييس نسبة الضوضاء لو حد علي صوته عن 70 ديسبيل بيتنبه و يقدر يميز لو بيصرخ او صوت ضرب نار  امتر من 100 ديسبيل او خناقة او خد سكران و بيقوم بتصرفات غريبة.
-مزود بمواتير بتمكنه من الحركة بسرعة 29 كم/ساعة مع سنسورز التراسوند و ليزر عشان يقدر يميز البيئة المحيطة بيه زي الموجود في العربيات ذاتيه القيادة كده و يقدر يتحرك ذاتيا.
-سنسورز لقياس درجة الحرارة و جودة الهوا عشان يتنبه لو حاجة ولعت بيكلم المطافي و يضرب سرينة.
-انفراريد للرؤية الليلية و كاميرا حرارية بتقدر تخليه يشوف ورا الحيطان حتي .

- و الشركة اعلنت قريب انها حتضيفله تقنيه يقدر يحدد بيها لو في شخص شايل سلاح في جيبه.

أنا اقتنعت و الله و لو عندي نشاط و محتاج سيكيوريتي حأجر واحد. 👏👏👏👏👏 برغم اني كل ما ابصله الاقيه شبه المكنسه و مش عارف اشيل الفكرة ديه من دماغي 😂😂😂😂😂.

بس K5 انتحر امبارح و رمي نفسه في النافورة في وسط يوم العمل و الناس ماشية حواليه في مول بولاية واشنطن في امريكا قرر يمشي ناحية سلالم النافورة و يوقع نفس في الميه.😓

انا معرفش ايه نوع البرمجة او الكود بتاعه عشان ابني حكمي هو فعلا عمل كده ليه بس اللي اعرفه ان الروبوت ده اتعرض لحدثتين اعتداء واحدة من شخص سكران بيضايق الناس لما الروبوت قعد يصفر راح الراجل رزعه بالشلوت شقلبه غالبا ده تعبه نفسيا 😖.
التانية كانت من احد احباب الله غالبا من عينة بنتي عجبه الروبوت قعد يرخم عليه و يزوق فيه لحد ما اتقلب علي جنبه 😂.
نيجي للسؤال المهم هنا ممكن فعلا الروبوتات تبدأ تحاكي مشاعر الانسان حتي لو مش فهماها يعني هل الحدثتين دول اثروا في تعلمه و برمجته زي ما قولت معرفش نوع الكود عشان احكم بس اللي اعرفه و مؤمن بيه ان K5 جاله شبه انهيار عصبي كمية داتا كبيرة كانت اكبر من انه يقدر يعالجها او يستحملها و يقدر يصدر احكام ترتب عليها عطل في المنطق عنده و خلاه ميقدرش يميز و يمشي بالغلط و يقع في النافورة او يختار ده بارادته لانه عارف انه ده حيعطله و ممكن يآذي حد حاجة زي kill swich متبرمجه فيه?????!!!!
بس ايا كان التفسيرين ده يثبتلنا ان الروبوتات ممكن متقدرش تستحمل الشغل لفترات كبيرة من غير متريح و تقدر تعالج الكود بتاعها اكنها شخص بينام مثلا و الحاجة الاهم و اللي دايما بأكد عليها كل ما تطور في الروبوتات و تديها مميزات بتقرب لكونها تبقي زي البني ادم و اللي عليه حترتكب نفس الاخطاء و حيبقي عندها نفس الحقوق و الاحتياجات كل ما بتتطور.
كان معكم #TRex_Magazine من مختبر تيريكس التقني.
ساعات و الله بفكر اكسر كل بوردات الميكروكنترول ديه و امسح كل الاكواد اللي بحاول اكتبها او اتعلمها و اروح اسقي حوض النعناع و كفي الله المؤمنين شر القتال!

اقتل الوحش و هو صغير AI

اقتل الوحش و هو صغير AI

               

كنا اتكلمنا قبل كده عن الMachine learning و ازاي ان بالتقنية ديه بقي الحصول علي ذكاء صناعي اذكي و اكثر قدرة علي حل المشاكل عن المبرمجة و اللي بتتبع سلسلة محددة من الاوامر. و قلنا ساعتها ان طريقة تعليم الروبوتات بتختلف من مبرمج للتاني.

عندك مثال AI اسمه Alpha GO ده ذكاء اصطناعي خاص بجوجل و اللي اتقن لعبة  صينية قديمة اسمها GO و هزم المصنف الاول علي العالم مؤخرا الامر اللي وصفه البعض بتطور عظيم للAI و ده لان علي عكس الشطرنج مثلا استراتيجيات اللعبة ديه عددها لا نهائي بس قدر Alpha GO انه يدرس انماط و طرق لعب حريفة اللعبة و غلب معظمهم في طريقه للتعلم حتي هزيمة بطل

العالم.

 \

المحرك الاساسي لبرمجة Alpha GO هو المكافئة بمعني انه في برمجته انه لما بيحمل حاجة صح بياخد درجة او مكافئة و ده الدافع ليه انه يحصل علي درجات عالية مقابل كل حركة يعملها صح. بس عشان تقدر تعمل الات ذكية تقدر تتعامل مع الواقع الخارجي يبقي لازم تكون واقعي انا مش حينفع اكافئه في الواقع علي كل حركة بيعملها صح و علي كل موقف بيتعلمه.

عشان كده فكر قسم الذكاء الاصطناعي في جامعة UC Berkeley انهم يمنحوا للروبوت اداه هي مفتاح البشر لتعلم معظم الحاجات اللي نعرفها النهاردة الا و هي الفضول. ذكاء اصطناعي عنده فضول هو مبيجربش و يعمل و يغلط عدد كبير من المحاولات عشان ينجح لا الدافع ليه هو الفضول ان يعمل المهمة الموكلة ليه بدافع الفضول هما بداو بتاسك بسيط زي انهم يخلوه يلعب سوبر ماريو بالمقارنة بالذكاء الاصطناعي العادي اللي بيتعلم بطريقة التجربة و الفشل و التكرار اتعلم انه يعدي كل مراحل اللعبة في وقت اقل و بتجارب و فشل اقل. حتي هذه اللحظة هما مشرحوش ازاي خلوا للروبوت فضول بس انت متخيل انك فعلا لو روبوت عنده فضول بيور حتي اللي برمجة مش حيبقي عارف هو عنده حيوصل لايه لانه ببساطة حيبقي عايز يعرف كل حاجة بتتعمل ازاي لان ثبت علميا ان الاطفال الاذكي هما اللي بيبقي عندهم فضول اكتر اللي بيجربوا و يسالوا و يحاولوا يعرفوا كل حاجة حواليهم
هنا حنوصل لنقطة مهمة جدا و هي جزء من بحثي الشخصي في مجال الربوتات لان فعلا انا علي يقين ان ده مفتاح الحصول علي ذكاء اصطناعي قوي الا و هو الاطفال.
                                      

بمراقبة بنتي و هي بتكبر قدامي و دراسة سلوكها و ازاي انها بتكتسب مهارة او اكتر كل يوم تقريبا عن اليوم اللي قبله و طرقها المختلفة في تعلم الاشياء ديه ادركت جزء من كيفية تطوير مهارات الذكاء الاصطناعي و فعلا كان الفضول و حب التجربة كان ديما الدافع الاساسي وراء كل الحركات اللي بتقوم بيها بس مش الفضول بس هو اللي ممكن يخليها تطور ذكائها.
الفضول نسخ الحركات حتي مع عدم فهمها او الهدف ليها التجربة و الفشل المكافئة و الالم و العقاب لتقويم السلوك.
عدد محاولات الطفل عشان ينتقل من مرحلة انها يحبي مثلا للمشي علي قدمين كبير جدا بس الدافع الاساسي مش بس انه بيدور علي طريقه اسهل و اسرع ينتقل بيها من نقطة للتانية في وقت اسرع بمجهود اقل الدافع التاني ليه بيبقي التقليد انه بيشوف الناس اللي حواليه بيتحركوا بالكيفية ديه فبيحاول يتقنها.
كذلك بقي قيس محاولة نطق الكلمات و اكتساب اللغة و مع كل محاولاته للنسخ و التجربة بدافع الفضول بيتم توجيهه و تعريفه الصح من الغلط علي محسب مقاييس الشخص اللي بيعلمه ده. مش بس كده كمان بتجربة الطفل الشخصية بيعرف ان ده سخن فمؤذي او ان لو نزلت بالطريقة الفلانية حتدش من فوق الكنبة زرع بصل فبيخش معاك متغير تاني غير التوجيه و التلقين و الفضول و النسخ الا و هو الاحساس بالالم.

ليه الكائن الحي بيحس بالالم اصلا عشان يعرف انه بياذي نفسه او ان الحاجة ديه مؤذية فغلط ميعملهاش هل فعلا لو اضفنا الخاصية او المهارة ديه لو صحت التسمية للروبوتات او الذكاء الاصطناعي بشكل عام بحيس انه يقدر يتعلم منها حيبقي اكتر تطور و ذكاء.

 

الاجابة كانت اه من مختبرات الذكاء الاصطناعي و الروبوتات و هي ان فعلا لو الروبوتات بدأت تحس بالالم حتقدر تتفادي ده فمثلا مش حيشيل الحمل ده لان شاله قبل كده بالطريقه ديه و في جزء فيه اتكسر او فاكر اخر مرة حاولت تعالج الخوارزمية بتاعتك بالشكل ده هنجت و قعدت اسبوع تعمل ريستارت و كانت ليلة سودة.ده بيحصل علي مستوي اقل دلوقت ان مثلا بتلاقي موبايلك فصل لو حرارته زادت اينعم هو لسه مبقاش بيتعلم يعمل ايه عشان حرارته متزيدش بس تخيل لو اتعلم ده.

خلص الروبوت من دول شغله و اتعلم اللي اتعلمه النهاردة و دخل يشحن او يريح في الوقت ده بدأ يراجع كل اللي اتعلمه و يصنف الحاجات ديه صح و غلط و يحطها في اماكنها زي ما مخ الانسان بيعمل و هو نايم بالظبط  و يكأنه بيحلم ده غير ان فيه ميزة جميلة انت لو بترفع الداتا ديه علي كلاود تقدر الروبوتات تتعلم من مهارات بعض يعني لو عندك الف روبوت كل واحد اكتسب فيهم مهارة واحدة انت الروبوت بتاعك بيكتسب في اليوم الف مهارة.روبوت زي Rethink Robotics مثلا بيتعلم بطريقة النسخ الحاجة بتتعمل قدامه مره و هو بيكررها مش بس كده بتقدر تعملها ابلوود علي كل الروبوتات اللي زيه كمان بيقترح عليك طرق اسهل للقيام بالتاسك اللي انت عايزها بحيث انه ممكن يعملها في حركات اقل فيوفر طاقة ووقت.
                                      

كمان الواقع الافتراضي فتح باب جديد  انه خلي روبوت زيFetch Robotics يقدر يتعلم تاسكات في الواقع الافتراضي باستخدام طريقة التجربة و الفشل بحيث انه لما يبقي في حالة التشغيل بالجسم المادي بتاعه يقدر يعملها و بالقعل نجح الروبوت في مسك الاشياء من المحيطة بيه بفضل التعلم في الواقع الافتراضي بالرغم انه كان اول مره يعملها في الواقع بتاعنا بجسمه اكن بالظبط الواقع الافتراضي ده اللاوعي بتاعه.الجديد بقي كمان ان بعد الروبوتات اللي بتقدر تعزف لقينا روبوتات بتألف قصص قصيرة و بتخلق الوان جديدة كمان زي ده و اتعلمت الكلام ده من تلقاء نفسها. من غير ما حد يعلمها عن طريق الانترنت.

السؤال هنا بعد كل الخواص و المميزات اللي عمال اديها للروبوتات و لو دمجتها مع بعض  هل من حقي كانسان لو عندي روبوت بيحس بالالم ان اشغله 24 ساعة متواصل مثلا لحد ما مواتيره تسخن؟ هل من حقي اجبره علي تعلم وظيفه او مهارة ما و هو عنده فضول يتعلم حاجة تانية ادركه او شافها بالصدفةا؟ هل من حقي اختار اقفله امتي مش ممكن ميكونش استكفي من التعليم النهاردة مثلا؟ طب لو اتعلم مني حاجة انا مش عايزة يتعلمها هل من حقي امسحها ؟.................. ملايين الاسئلة و الاحتمالات لاني بدأت و انا بخلي الذكاء الاصطناعي يزداد ذكاء انا بدأت اخليه شبهي اضفي عليه صفات الانسانية واحدة واحدة و حتي لو الزمته بقوانين و قواعد معينة في برمجته الاساسية حيلاقي طريقة ما بسبب الفضول الالم الخوف ... انه يلتف حوالين القواعد ديه زي البني ادم ما بيعمل (انا سرقت عشان اوكل عيالي) و تلاقي بقي الناس الروبوتيست المطالبين بحقوق الروبوتات عايزين يحددوا حقوق الروبوتات و ده بيتناقش بالفعل دلوقت زي ما مكتوب في المقال في الرابط ده و يزداد الذكاء كمان و تبدأ الروبوتات تطلب باحقيتها في ادارة الكوكب لاننا غير جديرين بيه و بندمره. و انهم احق بالكوكب و اننا ننصاع لاوامرهم لانهم حيقدروا يحافظوا عليه زي افلام الخيال العلمي .ده غير المطالبه بحقوقهم الشخصية في المساواة بالبشر و ان ده نوع من التحضر ان البشر و الروبوتات يعيشوا في مساواة.

 و ده حذر منه ايلون ماسك و عالم الفيزياء ستيفن هوكينج ان الذكاء الاصطناعي لو مضي علي الوتيرة ديه حيمحي البشرية يمكن ده اللي خلي ايلون ماسك يفتح شركته Neuralink في المقام الاول لانه شاف ان الانسان لازم يتطور و يندمج مع الذكاء الاصطناعي عشان تبقي ليه اليد العليا و السيطرة عليه لاما حيبقي كائن مقدرش يواكب التطور و غير جدير بالقيادة.

مظنش انك حتستمتع لو و انت سايق عربيتك السمارت في المانول موود و كلت بيها مطب و لقيتها ركنت علي جنب و بدأت تقولك انك بتسوقها بطريقة مش كويسة و بتأذيها و انك مبقتش تهتم بيها زي اول ما اشتريتها و اشمعني عربية أحمد صاحبك فيها بازوكا و سبويلر وانا لا مظنش انك حتستمتع بالمناقشة ديه خالص.
تقدم الروبوتات ماشي محدش حيقدر يوقفه بس لو انت من المهتمين بالمجال و عندك رؤية و افكار ليه لازم تحط في اعتبارك الكلام اللي قولناه في المقال ده ده لان حتي لو لسا متعرضناش للمشاكل ديه لازم نفكر في طريقه لحلها.
اقتل الوحش و هو صغير لاما حتلاقي نفسك في مواجهة مع اللي صنعته ايدك و مواجهة تانية مع نفسك لانك ساعتها حتي مش حتقدر تحدد حتي هل من حقي اقفله خالص و امسح بياناته ولا كده ابقي انا مجرم في حقه او حتي قاتل؟؟؟؟؟؟؟؟؟؟؟؟!

Written by: Amr Khaled - T.Rex

#AK_TRex

#TRex_Magazine