أكبر محطة طاقة شمسية علي مستوي العالم في مصر- Benban Solar Park

أكبر محطة طاقة شمسية علي مستوي العالم في مصر- Benban Solar Park

بحكم دراستي كمهندس قوي ميكانيكية و أهتمامي بمجال الطاقة بشكل عام و الطاقات النظيفة و المتجددة بشكل أكثر كنت دايما بحس بالحسرة و أنا بتابع الأخبار عن كمية الكهرباء اللي بتنتجها الدول الاوروبية من الطاقات المتجددة و خاصتا الطاقة الشمسية و قد ايه هما بيسخروا جزء من قوي الطبيعة لصالحهم و حلوا مشكلتهم و الذلة اللي كانت ممسوكة عليهم في ركب التقدم بتاعهم الا و هي توفير الطاقة. الحسرة كانت بسبب اننا زي ما كنا أتكلمنا في مقال قبل كده " الشمس مش بس للتان" درجة سطوع الشمس في مصر الأكبر علي مستوي العالم و ان ازاي اول محطة طاقة تم انشائها علي مستوي العالم كانت في مصر من اكثر من 100 سنة قبل أي حد.

بنبان هي قرية في مدينة اسوان الجميلة أو زي ما بحب أسميها دائما بلد الناس الطيبين. القرية ديه تم أختيارها كمكان لأقامة المشروع  وفقا  لدراسات تمت عن طريق وكالة ناسا. مشروع محطة بنبان جزء من برنامج شموس النوبة فعلا مشروع قومي بجد و أتأخرنا فيه كتير و كان ممكن يحللنا ازمات كتير بس الحمد لله قدرنا أننا نلحق الي حد ما بركب ترند الطاقة المتجددة المنتشر علي مستوي العالم لا و نتفوق فيه كمان. محطة بنبان للطاقة الشمسية لما يتنهي أنشائها حتبقي أكبر محطة للطاقة الشمسية علي مستوي العالم و أكبر شبكة توليد طاقة من الخلايا الكهروضوئية في العالم برضو.يكفيك أنك تعرف ان نفس المحطة اللي في ألمانيا تقدر تولد ضعف الطاقة الكهربائية لو كانت في مصر.
الجميل في الموضوع أنه الموضوع مش كلام علي ورق ولا وعود زائفة الا تم بالفعل الأنتهاء من المرحلة الأولي من 4 محطات رئيسية و أفتتاحها يوم 13 مارس 2018. محطة بنبان بتحتوي أجمالا علي 32 محطة فرعية  من الخلايا الكهروضوئية علي مساحة 37كم مربع عشان تولد كهرباء بقدرة 1650MW و اللي مخطط أنه يتم الأنتهاء منها عام2019 عشان تعزز القدرة الأنتاجية للكهرباء في مصر و تتغلب علي مشكلة طلب الطاقة المتزايد.

تكلفة أنشاء محطة بنبان حتوصل الي 3.4 مليار يورو بتمويل من البنك الدولي و بنوك أخري. المشروع ده حيوفر في مرحلة الانشاء الأنشاء أكتر من 10000 فرصة عمل و 4000 فرصة عمل لما تخلص و تشتغل بأذن الله. غير ان ده حيجذب أستثمارات كتير لمنطقة الصعيد المظلومة معانا و اللي فيها شباب يفوت في الجبل بس مع أنعدام فرص الأستثمار و تراجع السياحة بشكل مؤسف بيضطروا انهم يدوروا علي شغل في أماكن تانية و يسيبوا الجنة ديه.
الأجمل أكتر في الموضوع ان صدر قرار لأعداد مدرسة التعليم الصناعي في بنبان الي مدرسة للطاقة الشمسية لأعداد كوادر من أهل المكان قادرين علي العمل مع النوع ده من المشاريع و اللي بيعتبر مستقبل الطاقة في العالم و في مصر خاصتا لو ركزنا عليه شوية مش حنحتاج نستورد محروقات بالمليارات أو حنقلل أستخدامها للحدود الدنيا غير طبعا أثر ده علي البيئة و ازاي حنساعد في تقليل الأنبعاثات الخطرة اللي بتسبب الأحتباس الحراري و بتضر بصحة الناس و بكده نبقي ضربنا كل العصافير بحجر.
مشروع عظيم و نواه لبصيص يمكن فعلا ربنا كاتب أن يبقي فيه أمل.

Written by: Amr Khaled - T.Rex

#AK_TRex
#TRex_Magazine